I yoh kaam ki khynroo toh iwa hakhmat dooh yow yoh yei suk i saaiñ: Shangpliang

U MLA ka AITC na Mawsynram, u Himalaya Muktan Shangpliang da ong u wa ka roi ka paar ym em ko hapoh ka jylla lada ym em i chongsuk chongsaaiñ.

U HM Shangpliang da ong u ya ini hawa klam chimbynta wow yatai hajrong ka ‘Governor’s Address’ hapoh ka yung dorbar mang tangka ynne ka sngi.

U Shangpliang da ong u wa da dap u dei sñiawdiaw wa ha i klam yong u Lat ha ka sngi sdang yong ka dorbar mang tangka, ym em da kdaw yei eh hawa yatoh wa i chongsuk chongsaaiñ, i yada wa i chngaaiñ yong ki kynthai khynnah, i eh hajrong i yoh kaam yoh jaam, i eh hajrong i roi i drugs, i eh yong ki thaaiñ khappood, i eh ha ka liang ka puræ puthi, i chait i khiah wa ki kaam uiñke suwari.

Da ong u leh wa najrong kini, ym em leh kdaw hajrong i eh wa ki warep da yachem ki wa i emkaam wow nang pynboon ya ki Seat ha ka Medical wa Engineering hapoh ka jylla, i eh wa mih nei sahkut kari, i eh nei wan chong buhai chnong ki bru wa na baar, i eh na ki khyrdop khrong dan wa da pynyieñ pyrchah ya ka aiñ wa kiwi de.

Related posts

Lada ka sorkar sñiaw ko wa emkaam palat ko wow wanrah luti rel ye ko wow lai chakhmat: Ardent

May 12, 2025

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Uni u MLA ka Mawsynram da ong u wa i chongsuk chongsaaiñ toh kawa emyatoh bait wa ka roi ka paar wei ya ka roi ka paar hi ye u yoh du lada em i chongsuk chongsaaiñ hapoh ka jylla.

“Ha ka jylla yong i, daw em bait i jia wa boon rukom kiwa daw ktah yei chongsuk chongsaaiñ ha ki bynta waphær waphær, kamtæ lada i chongsuk chongsaaiñ ym em i, ym em leh i ku yong ka roi ka paar hapoh ka jylla,” da ong u.

“I da sakhi i yeiwa boon kiwa jia, kam i yap yong u Cherishterfield Thangkhiew iwa da wanrah ya i wym em i man chngaaiñ kawa da neh kamwa chi tayaw. Hadien ini da sakhi yei tympdung Bomb IED ha nongbah Shillong iwa da booh hei chong syier ya ki paaid chong chnong,” da ong u Shangpliang.

Da ong u, “Man iwa sakhiat wa e mysien wa ka HNLC da tyrwa ko wa kwah u yaklam yasuk khlem booh kyndon, tangwa iyi wow jia lada ym mankaam ini. Ym kwah i wa ini i kwah yaklam u kut noh chiteiñ.”

U Shangpliang da kylli u leh wa ileh wa ki khynroo lai psiah ki cha ki seiñ wa kieñ tiar yaleh, toh neidaw wym biang ha ka laad yoh kaam yoh jaam, kamtæ man ko iwa emkaam wa neiliang yong ka sorkar wow chimkhia hajrong kani ka phang. Da ong u leh wa boon ki khynroo khyllood kiwa da biang i stat i tip ki wym yoh kaam yoh jaam wei da man ko iwi na i eh wa hakhmat dooh.