U President ka Khasi Student’s Union (KSU), u Lambokstarwell Marngar da khana u wa ki seiñbhalang da klam che ki cha ka sorkar wa ha ka kylla wa ar yong i pynbait pood chwa wow soi ya ka MoU lane u chim ya kawon kawon ka rai wa khaddooh toh u ya syllok lang wa kiwa embynta waroh yow lait de u mih i eh.
Ki seiñbhalang wa kynthup ya ka KSU, FKJGP, ADE wa kiwi de ynne ka sngi da yachem ki ya u Montri Rangbah kamjooh u Symbood Montri Rangbah yow pynsñiaw yei wym hun hajrong i dooh noh ya kiwa boon ki thaw cha ka Assam hei pynbait ya u pood u ang yong ki 6 tylli ki thaw ha ka kylla wa nyngkong.
U Lambok da ong u wa ki seiñbhalang ki sñiawthooh ki yei ong ka sorkar wa da man iwa eh wow uiñ biang cha ka soskular namo ka Memorandum of Understanding, tangwa da pynrap wa ka Assam wa ka Meghalaya ki em ki ha India wei em ka luti wei chong hei stat ka sorkar kammon wow thooh, wei ka sorkar ym toh u yoobeiñ lane mylliñ yei joo umkhmat kiwa chong chnong.
Uwa yahkhmat ka KSU da ong u wa katni ki seiñbhalang ki ieh ki hei stat ka sorkar wei ka yurim yong ki seiñbhalang toh yow paitbniah wei pynsñiaw ki yei kyrmen wa ka sorkar daw thooh ko ya ki laad.
Hawa kylli hajrong i mih ki wym hun, u Lambok da ong u wa ka seiñ daw hap ko wow puræ bniah wei ya phyllu sani bha ym du da kiwa yahkhmat seiñbhalang, tangwa daw hap wow ya syllok lang leh wa ki hima, ki rangbah shnong, ki tre chnong yow tip iyi wa ye wei nei lumlang na kani ka ya syllok boi ye u chim ya kitæ ki laad chakhmat kammon wow leh ya ini i kaam pynbait ya u pood u ang.
