U Damewanhi L Rymbai uwa naka chnong Wapung, East Jaiñtia Hills District hawa pynbna paidbah wow yakhun Election MLA 2023 naka 6-Khliehriat Constituency, da ong u wa i daw tre wa pynman ya oo wow jied yaka luti yong ka saiñhima sima deiwa ieh noh yei kaam kam uwa sikai skur ka JHADC toh neidaw wa da hiar dor palat i yoh i kot wei leh wa joor i chah khñioñ beiñ ki paidbah haki bru wa embor.
Hawa klam wa ki laad pathai khubor ynne ka sngi ha Jowai da ong u, “Ileh wa nga hap O u iehnoh yei kaam sikai toh wa ka District Council ym ye ko wow su tulop neibhah wa da hiar palat i yoh i kot, weiwa hiar i yoh i kot man ko leh ka laad yaki bru wa em hei bor u yoh laad u pynman broo ya ki paidbah wa khian wa nai haki bynta waphær waphær”.
Da ong u leh wa kam u bru wa jooh embynta haki seiñ waphær waphær wa ha ka imlang sahlang da pyrchang u wow wanrah ya chiboon i kylla, tangwa da chem u wym ye wow pynmankaam yei angnood, kamtæ da rai u wow psiah noh cha ka lympung saiñhima sima kawa sñiawthooh u wa toh ka laad yow ye u wow pynmankaam yei angnood ki paidbah.
Da khana u wa hapoh ka 6-Khliehriat Constituency, ka Khliehriat toh ka District Headquarter kawa da em i baamtooh wa joor bha ha man ki khep ki wym ye de u niaw wa da tymmoh na khlieh ha kjat wei i ku i baamtooh hapoh kani ka District da roi hadooh wa da pynhiar cha tre dooh yaka District.
Hawa yatoh wa ki kyndon yow tih mooyong wa ka sorkar MDA da pynmih paidbah ko wa emkaam u em i thaw wa heh 100 Hectare, da ong u wa ym em ki tre mooyong wa em thaw hadooh katni wei hadooh ka aiñ MMDR Act leh ym em kdaw ko yei heh thaw hadooh katni katwa ka sorkar MDA won da kdaw ko emkaam yei thaw wa heh katni.
Da kdaw u leh wa hapoh ka sorkar MDA kitu kiwa em hei bor da man ki kam ki High Level Number-1 wei daw mih won sa ki Number-2 heiwa ki paidbah daw kylla mroo ki hapoh ki bru wa embor.
Da pynkynmoo u leh wa ya u mooyong wa da chah kem da em u kamwa 32 lak Ton hadooh katni ha East Jaiñtia Hills District tangwa du 75,000 Ton wa da yoh u ka chalan katwa ya u mooyong wa dang sah wa daw lilam da ka Coal India Limited deiwa hap wow thap Tender, tangwa kamwa da yoo wa da yoh u thap Tender da ki kattu katni donhi kiwa da tip kam ki High Level.
“I wym ye wow pyndep yaka 32 lak Ton hadooh ynne ka sngi da pynkulmar yaki paidbah wei boonsien yow mooyong da chim kabu wow pynbiej paidbah hawa jan Election”.
“Nga kam uwa jooh kreh mooyong nga sñiawthooh O wa kani ka lyngkor toh kawa nga hap O wow chim yei kitkhlieh neibynta wow thooh laad kammon wow chna ki laad ki luti lada yoh laad O wow embynta ha Secretariat khnang yow ye u pynwandur biang yei kreh mooyong kawa laitlooid wow im roi paar kamwa jooh man,” da ong u Damewanhi.
Hawa kylli yaka Party wa da yakhun u, da ong wa daw jied yaka Aam Aadmi Party lada pynyieñ kyrtong ko ha Meghalaya, tangwa lada ym pynyieñ won, u rai u wow yakhun kam u kyrtong samen.
Hawa pynrap chooh chooh yei eh hapoh ka Khliehriat Constituency, da ong u wa boon ki Scheme wada mang neibynta ki paidbah leh ka sorkar ym ye ko wow pynkrehkaam lane man ki kiwa sahteiñ, nadooh ki umbaam umdih, ka chnat wa toh u pait yei chait i khiah, ki luti syngkieñ, ka puræ puthi, i yoh kaam yoh jaam, najrong wa boon leh ki thaw wow pait kyrpang yong ka sorkar wow e yarap ya kiwa da chah kdoh chah koom hei dih pynmuaid wa boon jait wa kiwi de i eh.
Da pynsñiaw u leh ya kiwi won ki kaam wa angnood u wow wanrah lada poi haka thong itæ wow yarap ya ki warep neibhah boon wa da kyruiñ cha ka rep ka riang hadien wa da khang mooyong, wow chimkhia u pynneh yaki riti dustur wa da jan dooh wei wow pynku ya ka yalehke Sport wa kiwi de.
Heijooh i por da ong wa kamwa ka Jowai da maad ko yei eh wa da mih nei jhep, wei i lai luti u da yoo wa haka 6-Khliehriat kam ka yaw Ladrymbai, yaw Khliehriat leh ym pu em ka thaw wa biang, kamtæ da ong u wa da chynna jngai u leh hajrong i khooid i suba.
Ha waroh, u Damewanhi da pynbna u ya 25 tylli ki phang krehkaam.
