U Montri Rangbah ka Meghalaya, u Conrad Sangma da ong u wa hanla i yachem hapyrdi ki Montri Rangbah ka Meghalaya wa Assam hajrong u pood u ang ym em de pynman ya ki da rap slem tangwa i yaklam da em ki chwa wow Himanta Biswa Sarma chimkti u kam u Montri Rangbah ka Assam.
“Chwa wa u Himanta Biswa Sarma chimkti u, da yaklam i hajrong u pood nadooh kitu ki por,” da ong u Conrad.
Da pyntip u leh wa la chisnem tam hadooh ar snem, ka MHA (Ministry of Health Affairs), khamtam u Union Home Minister, u Amit Shah da kwah bha u wow pynbait noh ya u pood ka jylla iwa da ktah ya ka jylla wei kamjooh ya ka thaaiñ waroh kawi.
U Conrad da khana u leh wa ha ka tayaw wa dang dep da yachem u wa u Sarma ha Guwahati heipor yachem lang ki yow ya baam ja deilang wa ki kurim ki.
U Conrad da ong u leh wa ini i kaam ym toh iwa suk wow pynbait iwa da sahkut la 49 snem wei yow ye u lai chakhmat waroh arliang toh u ye ki u ya krehlang.
Da ong u leh wa ini i por toh iwa biang bha wow yaklam chaphang u pood neibhah da em chwa i yatoh lok hapyrdi kiwa yahkhmat ka Assam wa Meghalaya.
U Conrad da ong u leh wa em kiwa tyrwa wow sdang deiwa khooid nadooh wa sdang ya ini i pynbait pood wei hajrong ini da ong u wa daw pait ya ki kot ki sla wei daw sdang biang da ka pliang wa khooid.
Hawa kylli wa lada ym ye u pynman ya kini ki yachem ki Montri Rangbah, da ong u wa ym ye wow ong ya itæ tangwa emkaam wa kam kiwa yahkhmat emkaam wow chim ya i rai yow lai chakhmat.
“Ki pateiñ wa i por wow wan daw kynmoo ki ya ini wa iwa jied i wa iwa rai i. Kamtæ emkaam wow pait leh ya iwa heh i dur wei kam ka sorkar u leh i katwa ye yow pynlai ya ini i yaklam chakhmat wei yow poi cha i ya pynbait iwa ya hunlang,” da ong u Conrad.
