Ka seiñ Federation of Khasi Jaiñtia & Garo People (FKJGP) East Jaiñtia Hills District, da e dorkhat ko cha u Prakash Javadekar, uwa man kam u montri ka sorkar pyrdi wa pait ya ka chnat Forest, Environment & Climate Change wow pynsñiaw yei pyrchah ka seiñ heiyatoh wa i yoh Environmental Clearance ka M/S Star Cement wow pynheh ya ka paar tih moochuni kani ka karkhana ha i thaw wa heh kamwa 42.051 Hectares ha Brichyrnot.
Ka seiñ da ong ko wa i daw wa pyrchah ya ini i tih toh wa daw booh i hei maa ya ki mrad wa em hapoh ka Narpuh Wildlife Sanctuary neibhah wa em ko harood ka Eco-Sensitive Zone kamjooh leh daw wanrah ko yei ktah wa khroo ya ki le tylli ki wah kam ka Wah Lunar, Wah Umso Nallah wa ka Wah Lukha kiwa jan bha wa kani ka thaw tih moochuni.
Neiliang ka FKJGP da ong ko leh wa i pynjæd ki karkhana pynmih khyndaw-bilat wa em hapoh ka thaaiñ ya ki khloo wa rben daw wanrah ko yei doohnong iwa khroo wei daw booh ko hei maa ya ki bru neibhah i chit dang ku i kat dang mih ki snem kamjooh leh daw khate ko yei bor ka la’ær Oxygen wa toh u psa yei mynsien bru.
Chooh chooh da ong ko wa lada ka chnat wa pait ya ka rymaw (Forest & Environment) lai ko chakhmat wow pynjæd ya kani ka thaw deiwa ebor ya ka M/S Star Cement wow khloh yabor ya u moochuni na kani ka thaw, ini pynyoo wa i em yong ka chnat ha ka sorkar jylla wa ka sorkar pyrdi ym em yumut de u klam ko chaphang ka rymaw næ wow lehwarom ya ka World Environment Day kamjooh da pynyoo wa ka sorkar da leh yabor ko ya ka hok u paidbah hapyrdi i pyrchah wa joor yong ki kamjooh ki seiñbhalang yong ka thaaiñ hadooh le sien wow pynman ya ka Public Hearing wa da khut pynman da ka Meghalaya State Pollution Control Board, Shillong.
Heijooh i por da ong ko wa ka seiñ chirup wa kiwi ki seiñbhalang wa ki paidbah ka thaaiñ ym e laad ko ya ka M/S Star Cement wow pynheh ya ka paar moochuni yong ka kat wym pu pdiang da u paidbah wa boon wa lang wymtoh u leh bor ka sorkar neibhah ka ri India toh ka ri synchaar paidbah.