Jowai: Uwei u samla, uba kyrteng u Wanshuwa Surong, uba na ka shong Thangbuli, kaba hap hapoh ka Amlarem Sub-Division ula ioh ban pyllait im ia uwei u khun ‘la thapsim (Leopard Cat).
Ka khubor kaba iohlum thikna ka iathuh ba u Wanshuwa ula ioh ia utei u mrad khlaw hynnin ka sngi na ka jaka rep synsar kaba la tip kum ka Ammiaw. La iathuh ba haba ula iohsngew iaka jingwiar jong u ksew hajan ka jaka rep jong u; ula leit peit bad ula lap pynban ia utei u ‘la thabsim.
Ula rah ia utei ‘la shapoh shnong ban pan jingmut na ki rangbah ban leh kumno ban ai jingiada ia u, kumta mar mar ki katto katne ki nongshong kila pyntip sha ka kong Heisa Lato, DFO, Wild Life Division, West Jaintia Hills District kaba mardor kala phah iaki nongtrei jong ka tnad ban shimti ia utei u ‘la thapsim.
Hynne ka step hadien ba la dep phah jurip iaka jinglong jingman utei u ‘la thapsim ha ki doctor ba dei peit iaki mrad, ka kong Heisa haryngkat kiwei kiwei ki nongtrei ka tnad Wild Life kila leit ban pyllait biang ia u sha ka juh ka khlaw.
Haba iakren bad kong Heisa, kala ong ba utei u khun khla u dei uba dang 1 bnai eiei bad dei halor kane kila leit ban pyllait ia u sha katei hi ka khlaw ne ka jaka shong kaba u juh.
“Ban ai jingiada ia kum kine ki mrad khlaw kiba la jan duhjait ha kane ka thain, kiwei ruh ki dei ban bud iaka nuksa jong utei u samla da kaba pyllait im iaki khnang ba kin roi”, la ong ka kong Heisa.
Discussion about this post