May 6, 2023
Ka seiñ kiwa em duna hei bor khmat wa tip kam ka Blind Lead Trust, ynne ka sngi da e kti ko ya ka yung wa yarap chna ko neibynta ka Mary Kyndait kawa chnong wa sah haka chnong Kremmyrsiang wa haap hapoh ka Namdong C&RD Block, West Jaiñtia Hills District, wei ka Mary leh toh kawa em duna hei bor khmat.
Ya kani ka yung da wan wai da u MDC ka thaaiñ u Dawan Lyngdoh hei emlang ki dkhot ka seiñ Blind Lead Trust, u waheh chnong ka Kremmyrsiang, u Bhalang Dkhar, kiwa ha-yung ha-sem ka Mary Kyndait wa kiwi.
Neiliang u Managing Director cum Co-Founder ka Blind Lead Trust, u Jitendra Dkhar hawa klam ong u wa neiliang ka seiñ hadien wa yoh yutip ko yei jynjar i saja wa maad ka Mary heiyatoh wa ka yung trep wa chong wa sah ko i wym em de man chngaaiñ yaka khamtam hawa slap wa joor la-ær, kamtæ da hiar ki cha kani ka chnong yow chem yei sakhiat.
Neitæ hadien wa yoo wa kani ka manbei da emkaam sakhiat ko u yoh smat i yung yow lait na u slap kamjooh kiwi ki maa wa yang yei chait i khiah yong ka, da chim ka seiñ ya ka luti wow pynlut pynsep tang yow yoh chwa ko u rieh tngen.
Wei manda sdang, sñiawkmen u leh wa nadooh kiwa ha-yung yong ka, ki lok ki jor ki para chnong da wan yarap lang ki la dei bor lane da ka poisa.
Heijoooh i por leh booh u i kyntu yaka chnong ka thaw ka imlang sahlang wym hoi u paitkhmat næ yoobeiñ yaki bru wa em duna hei doh i pran tangwa u yarap pynyoo luti wei burom leh ya ki.
Da kyntu u leh wow e u embyntalang ha ka imlang sahlang ya kiwa duna neibhah wa ki leh em hi ki i bor stat wa da e sap u Blai.
U kongsan yong kani ka sngi won, u Dawan Lyngdoh hawa klam da e yaroh u ya kani ka seiñ wa wot hapyrdi wym biang ki bor khmat leh ye ko u leh kat ini i kaam wa khroo neibynta ki para dkhot, iwa wot da i kiwa chynna ki khmat leh wymtoh i kaam wa suk u leh i.
Kamtæ da ong u wa kani man ko ka nongmuna wa bha wei lada i kam kiwa biang hei doh i pran leh bood i ya kani ka nongmuna, ngait skem u wa ka imlang sahlang ym maad ko yei eh i khoo.
