U Mayalang Pakem uwa man u khon yong u Plan Lyngdoh wa ka Stillda Pakem uwa na Mynthong, Jowai, da jop u ar tylli ki takma ksiar ha ka lympung yakob pynyoo heh dohksah kawa tip kam ka Mr. & Ms. East India Natural 2026, kawa da pynman ha Rangia Officer’s Colony Hall, Assam.
U Mayalang Pakem toh uwa chah sikai ha u Dr. B. Desire Kynjiñ kam u Coach wei u tre ka Satar Gym, Ummulong.
Kani ka rynsan yakob toh kawi na ki yakob Bodybuilding & Fitness kaw heh tam ha India, kawa tip kam ka Biggest Natural Bodybuilding and Fitness Championship Federation of India & South East Asia wei kawa da tipmit leh da ka NITI Aayog yong ka sorkar pyrdi heiwa da wan wow chimbynta hadooh 897 ngut na ki jylla waphær waphær yong ka ri India.
U Mayalang Pakem toh uwa da jooh jop ha ki rynsan Bodybuilding kiwa heh hapoh ka ri India wa kynthup ha ka Mr. & Ms. India Natural Men’s Physique wa ka Mr. & Ms. East India (Zonal Bodybuilding & Model Championship) kawa da pynman ha Guwahati ha u bnai February uni u snem.
Ha kani ka yakob wa kattæ da pynman ha ka 20 wa 21 tarik u uni u bnai, u Mayalang Pakem da wanrah burom biang u sa chisien ya ka District wei kamjooh leh ya ka jylla Meghalaya heiwa ha ka 20 tarik da yoh nyngkong u ha ka yakob Mr. & Ms. East India Natural (Annual Zonal Title Championship on Natural Bodybuilding and Fitness) ha ka kyrdan Bodybuilding Up to 60 Kg.
Ha ka 21 tarik da yoh nyngkong u sa ha ka No-Drug Fit Classic 2026 (Annual National Pro-Qualifier Championship on Natural Bodybuilding and Fitness) ha ka kyrdan Bodybuilding Up to 60kg.
U Mayalang Pakem da yoh u leh ya ka Pro-Card na ka FIN (Fit India Natural) Bodybuilding & Fitness Federation iwa da pynman ya oo kam u Pro Athlete. Wei da ini i yoh Pro-Card, da chah jied wow lai mihkhmat ya ka ri India ha ki yakob International Level Bodybuilding Championship kiwa daw man neini chakhmat.
Ini i jop u Mayalang Pakem da man ko ka nongmuna wa bha ya ki khynroo kiwa em i thmu wow lait nei kyrni ha ki kaam wa sih yow lait leh na ki jait kjut wa boon jait kiwa ktah yei bor pyrkhat kamjooh kiwa pyndooh mynsien, kamtæ da kyntu u ya kiwa em i thmu wow poi cha ki kyrdan kiwa rap chakhmat wow jied ki ya kani ka yalehke wa pynchait pynkhiah.
Dei mynsien wa khian kam uwa yalehke yong ka Meghalaya uwa da mihkhmat boonsien ya ka jylla, da kyrpaad u ya u Sports Minister wa ka sorkar wow kyruiñ khmat ko cha kam kani ka jait Sports leh neibhah kani man ko kawa emkaam bha neibynta i chait i khiah ym du i doh i pran tangwa i bor pyrkhat pyrdaiñ yong uwi pa uwi u bru.
Puræ leh: Jop u Mayalang Pakem uwa na Jowai ya le tylli ki takma ksiar ha ki yakob pynyoo heh dohksah
Discussion about this post