Ka BJP kawa synchaar ha Tripura da jop suk ko ya ka TMC kawa da pyrchang wow psiah hapoh ka jylla deiwa chimbynta ha Tripura Municipal Election kawa da niaw Vote ynne ka sngi heiwa da leh hapoh ka Agartala Municipal Corporation wa ha kiwi de deiwa jop ha 329 tylli na ki 334 tylli.
Ini toh i sien wa nyngkong wa da yaleh Election Municipal ka BJP hadien wa yoh ko wow poi hei bor hapoh ka jylla Tripura ha u 2018 heiwa ka yalap Election Municipal da man ko kawa chit bha wei da mih leh ki sñiaw yaphær jaitbru wei da poi leh cha ki yung bichaar hadooh wa hap ka Supreme Court wow tuklar yow man ka thap Vote kawa suk.
Da pynemkaam leh da kiwa boon ki CRPF yow pynlai bait ya ka aiñ.
Neiliang ka TMC waka CPI(M) da pynbaad ki wa da em i leh thok hei thap Vote wei toh u pyndam noh ya kani ka Election.
Ka CPM da jop ko 3 tylli, ka TMC ka wi donhi deilang waka TIPRA katwa ka INC nod.
Neiliang u Prime Minister, Narenra Modi da e khublei u ya waroh ki wakreh ka Party kiwa da kreh khlem chong ngiah.
Neiliang won u Chief Minister ka Tripura, u Biplab Kumar Deb da ong u wa ini pynyoo ko yei chaniah ki paidbah yei biang i synchaar deiwa kular wow kreh chooh chooh yow wanrah ya ki kaam pynroi.
