Ka BJP da pynkhreh ko wow chna sorkar haka jylla Madhya Pradesh, Rajasthan wa Chhattisgarh katwa ka Congress won ha ka jylla Telangana.
Ya ka niaw Vote yong kini ki soo tylli ki jylla da pynman ynne katwa ha Mizoram won mynstep heiwa da em palat 160 Million ngut ki bru wa da thap Vote.
Kini ki Election man ki kiwa emkaam ya u Narendra Modi uwa daw yaleh wow man biang kam u Prime Minister ka ri mynried snem haka Election MP wa daw pynman wei kamwa man kattæ da yoo lakam wa da mankaam i neibhah ka Congress ym em da ye ko wow pynyoo yei bor.
Ha u snem 2018, ka Congress da jop ko ha Rajasthan, Madhya Pradesh wa Chhattisgarh tangwa hadien le bnai, ka BJP da jop ko deiwa suk ha ka Election MP wot ha kini ki le jylla wa jop ka Congress heipor ka Election MLA. Ha India ka Election MLA wa ka MP da yaleh hajrong ki yurim wa ki kular wa phær wei hanla jop ka BJP ynne, ym ye u ong deiwa tikna won ha ka Election MP.
Ini i jop ka BJP ynne da man ko iwa emkaam yei pynkhlan bor ya ka heiwa rap tlot ko ha ki Election MLA heiwa na waroh ki jylla da em ko du 9 tylli ki jylla wa yah ko da ka nakhmat yaka sorkar katwa ha kiwi ki jylla toh da ki sorkar wa yakrehlang wa kiwi.
Ka BJP ynne da ye ko wow knieh yaka Rajasthan wa Chhattisgarh naka Congress wei da ksoh ko yaka Madhya Pradesh kattu san sien khlem rem. Ki 10 tylli ki jylla wa klam Hindi toh kiwa phah 225 ngut ki MP cha ka Parliament heiwa ka BJP da jop ko 177 ngut ha u snem 2019.
Ka Congress da ye ko wow knieh yaka Telangana naka Party kani ka jylla, ka BRS Party hadien wa jop ko sa kawi ka jylla ha South India ka Karnataka ha u Naisan uni u snem.
Hadooh wa pynmih ya kani ka khubor katkam wa da pynbna da ka Election Commission of India (ECI), ha Chhattisgarh ka BJP da jop ko 53 tylli wei dang tam ko sa ha kawi, ka Indian National Congress da jop ko 34 tylli wei dang tam ko ha kawi katwa ka Gondvana Gantantra Party da jop ko kawi donhi.
Ha Madhya Pradesh, ka BJP da jop ko 160 tylli wei dang tam ko sa ha 3 tylli, ka Congress da jop ko 64 tylli wei dang tam ko ha ar tylli katwa ka Bharat Adivasi Party da jop ko kawi.
Ha Rajasthan, ka BJP da jop ko 115 tylli, ka Congress 68 tylli wei dang tam ko ha kawi. Ka Bharat Adivasi Party da jop ko 3 tylli. Ka Bahujan Samaj Party da jop ko 2 tylli. Ka Rashtriya Lok Dal da jop ko kawi. Ka Rashtriya Loktantrik Party da jop ko kawi. Ki Independent da jop ki 8 tylli.
Ha Telangana, ka Indian National Congress da jop ko 64 tylli, ka Bharat Rashtra Samithi da jop ko 39 tylli, ka BJP 8 tylli, ka All India Majlis-E-Ittehadul Muslimeen da jop ko 7 tylli katwa ka Communist Party of India da jop ko kawi.
Discussion about this post