Ka Bharatiya Janata Party (BJP) da jop ko yaka Ladakh Autonomous Hills Development Council Election kawa da niaw Vote ynne ka sngi deiwa jop ya 15 tylli ki Seat na ki 26 tylli, ka Congress won da jop ko 9 tylli katwa ya ki 2 tylli da jop da ki kyrtong wa samen.
Kani toh ka Election wa nyngkong yong ka Council nadooh wa yaka Ladakh da pynman kam ka Union Territory.
Ka Ladakh Autonomous Hill Development Council (LAHDC) toh ka Autonomous District Council wa em ha ka Leh District ka Ladakh wei yaka LAHDC toh kawa da chna hapoh ka aiñ Ladakh Autonomous Hill Development Council Act, 1995. Ka LAHDC toh kawa em 30 Seat heiwa 4 tylli toh kiwa thung (Nominate) da ka sorkar.
Ka Kargil District ka Ladakh em ko ka yong ka hi ka Hill Council kawa da dep pynman Election ha u snem 2018 neibynta ka 5 snem.
Kani ka LHADC Election toh ka sien wa 6 wa pynman yaka heiwa yaka thap Vote da pyndep haka 22 tarik uni u bnai. Da em 94 ngut ki kyrtong kiwa da yaleh wa kynthup ya mar 26 ngut naka BJP waka Congress, ka AAP leh da pyrchang ko yei bok i nasib yong ka deiwa pynyieñ 19 ngut ki kyrtong katwa ki 23 ngut won toh ki kyrtong samen.
Kiwa da thap Vote da em ki 65.07% na ki 89,76 ngut kiwa da thap Vote ha ki 294 tylli ki Polling Station.
Nadooh wa sdang yaka LAHDC ha u snem 1995, ka Congress da jop ko la le sien, katwa ka Ladakh Union Territorial Front da jop ko ya kani ka Election ha u snem 2005.
Ini da man i i sien wa nyngkong wa jop ka BJP ya kani ka Election.
