Ka Dorbar Chnong Mawsynram da ye ko wow yieñ skem wei yasaaid hakhmat ka High Court ka Meghalaya yei rai yong ki wow khang yei wan lehniam ki Hindu hapoh ka krem Mawjymbuiñ iwa da pynman ya ka Yatra wow pyndam noh ya ka mukotduma wa da yaleh ko ynne ka sngi.
Ka High Court da booh ko ya ynne ka sngi wow chong bichaar biang ya kani ka mukotduma.
Kani ka mukotduma da poi noh ko cha wakut ynne hadien wa kiwa yaleh mukotduma da pyntip ki wa da pyndam ki yei thmu wow lai pynman yei lehniam ha krem Mawjymbuiñ wei da ini da man ko i jop ya ka Dorbar Chnong Mawsynram kawa da ban joor wa kani ka krem toh ka thaw uiñke suwari wei ymtoh ka thaw mane blai.
Neiliang u waheh chnong ka Mawsynram da ong u wa u pteiñ ki wow khang ya iwon iwon i lehniam hapoh kani ka krem wei man ko leh hei pait i pynlai ka chnong.
Kam wow pynkynmoo wa ini waroh da jia i hadien wa ka seiñ ki Hindu wa da e pyrtuid kam ka Yatra da yaleh mukotduma ki hadien wym yoh ki wow pynman yei lehniam ha ka 10 wa 11 tarik uni u bnai wei da lai ki cha ka yung bichaar yow ujor pyrchah yei wym yoh bor ki.
Neiliang u Hiamdor Rapsang, Asst. Waheh Chnong da ong u wa ka krem Mawjymbuiñ toh kawa da tipmit kam ka thaw uiñke suwari wei kam ka dorbar chnong em bor ko wow rai kammon da pynemkaam ya kani ka thaw.
U VGK Kynta uwa man kam u muktiar ka chnong da pyntip u wa ka High Court da mynjur ko yei tyrwa wow thung da ka Committee ka wow pait yow pynbha pynmiat ya kani ka krem kam ka thaw uiñke suwari wei wow pynneh yei khooid i jngiar ko.
Discussion about this post