15 49.0138 8.38624 1 0 4000 1 https://wyrta.com 300 0

Jop ka Dong Main Road FC ha ka sngi sdang ka Umlyngsha Football League 2017

0 Comments

Khliehriat: Ka Dong Main Road FC da jop ko da 3-2 kool ya ka Dong Loom Pyrdi FC ha ka sngi sdang ka lympung yalehke kawa tip kam ka “2nd Umlyngsha Inter Dong Football League 2017” kawa pynman da ka Umlyngsha Youth Society & Sports Club(UYSSC), East Jaintia Hills District ynnin ka sngi ha ka madan Umlyngsha.

Ha kani ka yakhun kawa pynman heipor 12:30 nohchariñ ka sngi hapyrdi ka Dong Main Road (RBB Road) da jop ko ya ka Dong Loom Pyrdii FC da 3-2 kool heiwa ka yakhun da man sakhiat ko kawa yoosuk bha khamtam kawa pynchoh biej ya ki paidbah wa paitke ha kani sngi neibhah ka yakhun da man ko kawa ya biang bor bha manla kini ki dhab ha kani ka sngi.

Ya ki kool yong ka Dong Main Road da thap da u Pyiarly Shadong uwa da thap ar kool haka minit kawa 12 wa 24 wa ka kool na u Kermi Dkhar ha ka minit wa 55, katwa ya ki kool yong ka Dong Loom Pyrdii da thap da u Victor Shadong wa na u Wympoi Talang ha chwa kut ka por yalehke.

Ha ka yalehke kawa ar kawa man heipor 2:30 janmeit ha pyrdi ka Dong East Colony FC wa ka Dong Khadlynraaw FC ka yakhun da man ko kawa ya ryngkat bor ar liang nadooh wa sdang heiwa ka Dong Lhadlynraw da yoh chwa ko u thap chi kool lyngba u Sahlag Rymbai ha ka minit kawa 12 yong ka kylla miet katwa neiliang ka Dong East Colony da su kylliang ko ha chwa wow kut ka por yalehke.

0 Comments

Leave a Reply