Shillong: Ka Meghalaya da maad ko yei jop wa i rem ha kini ki ar le sngi heiwa ya ka Manipur da jop ka Meghalaya da chi Innings ha ka U-19 Cooch Behar Trophy, tangwa da rem won ko da 5 Wicket ha ka Arunachal Pradesh ha ka U-23 Col CK Nayudu Trophy.
Ha Goalpara, Assam, ka Meghalaya da pynrem ko ya ka Manipur da chi Innings wa 173 Run. Ha ka sngi nyngkong ka Manipur da yoh ko 29/5 ha ka First Innings hawa jubab yeiwa kamai ka Meghalaya iwa 281 deiwa haap lut ki Wicket.
Ha ka sngi wa ar ka Meghalaya da leh bha ko deiwa pynhaap lut ya ki Wicket wa dang sah heiwa ka Manipur da ye ko u kamai du 33 Run donhi. Uwa kawang bol ka Meghalaya u Abhishek da pynhaap u 9 tylli ki Wicket deiwa e u 11 Run.
Ka Meghalaya da phah ko ya ka Manipur wow leh ya ka Follow-on wei da ye ko wow kamai du 75 Run.
Ha ka Second Innings u Abhishek da pynhaap u sa ar tylli ki Wicket, u Aryan da pynhaap u 4 tylli ki Wicket, u Bipin da pynhaap u le tylli wa u Sudhir Sahani chi Wicket.
Ka Meghalaya ha ka U-23 Col CK Nayudu Trophy da rem ko ha ka Arunachal ha Mangaldai, Assam, ynne ka sngi.
Ka Meghalaya da kamai ko du 48 Run ha ka First Inning ha ka sngi wa nyngkong heiwa ka Arunachal da jubab ko da 163 Run deiwa haap lut ki Wicket ko.
Ka Meghalaya ha ka Second Innings da rap leh bha ko deiwa kamai 255 run deiwa haap lut ki Wicket ko deiwa yarap P Rohit uwa kamai 75 Run iwa da booh thong ya ka Arunachal 141 Run yow jop.
I smat haap ki le tylli ki Wicket ka Arunachal deiwa kamai ko du 5 Run da e mynsien ko ya ka Meghalaya tangwa ka u Gaurav Verma uwa kamai 53 Run da pynjop u ya ka Arunachal.
Discussion about this post