Shillong: Ka Meghalaya da jop ko yaka Mizoram da chi Innings wa 22 Run haka U-16 Vijay Merchant Trophy kawa pynman ha Golaghat, Assam, ynne ka sngi.
Uwa kawang bol ka Meghalaya u Nirdesh Baisoya toh uwa da leh bha deiwa yoh u waroh 9/36 na ki ar tylli ki Innings.
Ka Meghalaya da jop ko yaka kylla khlem ynnin ka sngi wei da phah Bat nyngkong ko yaka Mizoram.
Ka Mizoram da chah pynhaap lut ki Wicket ko deiwa kamai ko du 41 Run, heiwa kiwa kawang bol ka Meghalaya kiwa leh bha toh u Baisoya 4/11, Gagandeep Singh 2/3, Bharat Gurung 2/7, Avinash Rai 1/0 wa u Himanshu Yadav 1/14.
Ka Meghalaya hawa Bat ko ym em da ye ko wow leh bha heiwa da chah pynhaap lut ki Wicket ko deiwa kamai 137 Run. U Captain-Wicketkeeper u Mrityunjay Bharali toh uwa da kamai boon dooh da 39 Run yow pyntam yaka Meghalaya da 96 Run haka Innings wa nyngkong.
Ka Mizoram hawa Bat ko haka Innings wa ar da haap lut ki Wicket ko deiwa kamai du 74 Run.
Discussion about this post