Ka lympung yalehbol wa tip kam ka 5th 7-A-Side Football Tournament wa pynman da ka Dorbar Chnong Dulong, Jowai da poi ko cha wakut ynnin ka 4 tarik.
Ha kani ka sngi da em ka yalang wa pynlai da u Assistant Waheh Chnong, u Yatha Chyrmang wei da yoh i klam tbian na u Sienwanmiki Bareh.
U District Sports Officer ka West Jaiñtia Hills, u Khroobok Passah da man u kam u kongsan hei emlang kiwi kiwa chah khut sñiawbha.
Ka yakhun Final da pynman hapyrdi ka Nartiang FC waka Oxford FC heiwa ka yalehke da man ko kawa yoosuk wei kawa pynchongchit ya kiwa wan paitke.
Hawa kut ka yaleh, ka Nartiang FC da man ko kawa jop da 1-0 wei da yoh ko ya ka song poisa wa T. 40,000 chirup wa ki takma katwa ka Oxford FC won da yoh ko ya ka song poisa wa T. 20,000 deilang wa ki takma.
