May 31, 2018
Jowai: Ha ka Lion 5 Knockout Football Tournament 2018 wa pynman da ka Sports & Youth Affairs Committee ka Lion Mission Compound Dorbar Chnong, ynne ka sngi da pynman ya ki ar tylli ki yalehke.
Ha ka yalehke wa nyngkong ka Pohhali da jop ko ya ka Rising Star da ka yachut Tie-breaker da 3-2 hadien wa ka yalehke hadooh wa kut i por da neh ko mar chi kool.
Ka Pohhali da thap kool nyngkong lyngba u Heimonmiki Sutong ha ka minit wa 25 tangwa ka Rising Star da ye ko u su kylliang da ka kool wa thap u Yoolang ha ka minit wa 31.
Ha ka yalehke wa ar won ka Friend 8 United da jop ko ya ka Syndai United da 3-1.
Ya ki kool ka Friend 8 United da thap da u Niawkor Kyndiah ha ka minit wa 2, u Kner -I- Passah ha ka minit wa 13 wa u Obram Sumer ha ka minit wa 39 katwa ya ka kool yong ka Syndai United da thap da u Diwan ha ka mini wa 19.
