Ka Khasi Students’ Union Shnongpdeng Unit wa ka Bakur Dawki Unit da pynman ko ya ka lympung yalehbol wa tip kam ka Maitshaphrang Football Tournament 2023 kawa le sngi ha madanbol ka Dawki ha ka 16,17 wa 18 tarik uni u bnai.
Ya kani ka Tournament da wan wow pynhaap pyrda da u Lambokstar Marngar, President waheh dooh ka seiñ deiwa synraan lang u Laitphar Syngkrem, President West Jaiñtia Hills District Unit wa kiwi de ki dkhot deiwa emlang leh u Dolloi ka Elaka Darrang, u waheh chnong ka Shnongpdeng wa kiwi kiwi ki waheh deilang wa kiwa sikai skur.
I thmu ka seiñ wow pynman ya kani ka Tournament toh yow yarap ya kiwa yalehke wa em i sap wow yalehbol wei kawa kongsan i thmu toh yow yarap ya ki skur kiwa em ha Shnongpdeng, Dawki wa Bakur kiwa ka seiñ da jooh yarap ko na i por cha i por, neibhah boon ki khynnah wan ki na ki manyung wa duna ha waroh ki liang.
Ka seiñ da e khublei ko ya waroh kiwa yarap wei kiwa da wan chimbynta ha kani ka lympung yow pynyoo yei sap i phong yong ki.
Ha kani ka yakhun Final yei naam jop da yoh da ka Tyllilang FC.
