Jowai: Ka 1st Inter Office T20 Cricket Tournament wa pynman da ka Meghalaya State Government Employee’s Federation Sports Committee, Jaiñtia Hills Unit, Jowai da sdang ya ka ynne ka sngi ha Madan Thymme Lumpyrdi Mihmyntdu.
Ka yalehke wa nyngkong da pynman ha pyrdi ka Animal Husbandry & Veterinary Department pyrchah ya ka Water Resource Department heipor 9 waje i step.
Ka Animal Husbandry & Vety Department da jop ko ya ka kylla khlem wei da jied ko wow Bat nyngkong wei da kamai ko 207 Run deiwa dooh 8 tylli ki Wicket na ka 20 Over.
Ki Batsman wa leh bha toh u Dr. M. Kyndiah uwa yoh 60 Run, u Deibormi Rngad uwa yoh 52 Run wa u Kenny Phawa uwa yoh 29 Run.
Uwa kawang bol ka Water Resource u Mac Andy Suchiang da yoh u 4 Wicket na ki 4 Over wei da chah kamai u 25 Run.
Ka Water Resource hawa kdong ya thong 208 Run yow jop da yoh ko 125 Run deiwa dooh ya 9 tylli ki Wicket na ki 20 Over.
Ki Batsman wa leh bha toh u Heimonlang -i- Lyngdoh uwa da kamai 26 Run wa u Mac Andy Suchiang uwa da yoh 21 Run.
Kiwa kawang bol ka Animal Husbandry & Veterinary Department kiwa da yoh u pynhaap boon dooh ki Wicket toh u Deibormi Rngad uwa pynhaap ar Wicket na ki 4 Over deiwa e u 7 Run wa u Deibha Rymbai uwa yoh 2 Wicket na ki 3 Over wei da chah kamai u 18 Run.
Kamtæ ka Animal Husbandry & Veterinary Department da jop ko da 83 Run.
Ha ka yalehke wa ar ha pyrdi ka Education & Co-operative pyrchah ya ka PWD Cum Excise wa pynman heipor 12 waje pyrdi sngi, ka PWD Cum Excise da jop ko ya ka kylla khlem wei da jied ko wow Bat nyngkong.
Ka PWD Cum Excise da kamai ko 119 Run na ki 20 Over deiwa dooh 10 tylli ki Wicket.
U Sanki Pakyntein da yoh u 18 Run, u Da-u-ru Laloo da yoh u 18 Run wa u Daseinmitre Challam da kamai u 17 Run.
Kiwa kawang bol ka Education & Co-operative kiwa da leh bha toh u Firstborn Dkhar uwa yoh u pynhaap 3 Wicket na ki 4 Over wei da chah kamai u 19 Run, u Da-u-ru Laloo won da pynhaap u ar Wicket na ki 4 Over wei da e u 16 Run katwa u Rikidonal Shullai won na ki 4 Over da yoh u 2 Wicket wei da chah kamai u 23 Run.
Katwa ka Education & Co-operative won hawa kdong ya ka thong da poi thong ko deiwa yoh 120 Run na ki 13 Over deiwa dooh 8 tylli ki Wicket.
U Ridashisha Pohdweng da yoh u 47 Run katwa u Deep Das da yoh u 25 Run.
Neiliang kiwa kawang bol ka PWD Cum Excise u Teibok Laloo na ki 3 Over da pynhaap u 3 Wicket wei da chah kamai u 35 Run, u Da-u-ru Laloo na ki 3 Over da yoh u 2 Wicket wei da e u 17 Run katwa u Teilang War na ki 4 Over da yoh u 2 Wicket wei da chah kamai u 26 Run.
Kamtæ ka Education & Co-operative da jop ko da 2 Wicket.
Discussion about this post