Uwa yalehke kam u Guest-Professional ka Meghalaya, u Punit Bisht da kamai u iwa man iwa ar wa boon dooh haka parom ka Syed Mushtaq Ali Trophy ha Chennai ynne ka sngi hawa pynrem yaka Mizoram da 130 Run haka yalehke wa ar ka jylla ha kani ka T20 Tournament.
Ka Meghalaya da kamai ko 230/6 na ki 20 Over deiwa pynkut yaka Mizoram da 100/9.
Ka Meghalaya da phah yaka wow Bat nyngkong daka Mizoram heiwa da kamai nakhmat da u Yogesh Tiwari uwa yoh 53 na 47 bol wa kynthup ya 6 tylli ki 4 Run wa 2 tylli ki 6 Run, katwa u Bisht uwa da yalehke la 3 samoi waka Meghalaya, ynne ka sngi da kamai u 146 Not Out na ki 51 tylli ki bol kawa man kawa ar wa boon dooh i kamai Run ha kani ka yakob hadien iwa yoh u Shreyas Iyer 147 na ki 55 tylli ki bol kawa da yoh u yaka Mumbai pyrchah yaka Sikkim ha u 2019.
U Bisht da dat u leh 17 tylli ki 6 Run iwa man iwa boon dooh ha kani ka Tournament wei da poi u cha ka 50 Run du ha ki 26 tylli ki bol. Deilang wa u Tiwari da kamai ki 120 Run neibynta ka Wicket wa 3 na ki 10.4 Over hadien wa dooh ka Meghalaya 2 tylli ki Wicket hadien wa kamai 28 Run.
Neiliang uwa pynskit bol, u Aditya Singhania da man u uwa kawang bol wa leh bha dooh deiwa yoh 4/15 yaka Meghalaya. U Akash Kumar Choudhary da yoh u wow pynhaap ya artylli ki Wicket wa nyngkong uwi hadien uwi na ki ar bol deiwa yoh 2/17.
U Kilco Marak leh da lehbha u deiwa yoh 2/5 ha ki 2 Over wa kynthup ya ka Wicket u Pawan KB uwa kamai boon Run dooh yaka Mizoram deiwa yoh 33 Run. U Abhay Negi (1/16) da yoh u yaka Wicket wa khaddooh haka Over wa khaddooh ka yalehke.
Ka Meghalaya daw yachem ko waka Bihar haka sngi Thohdieñ.
