Shillong: U MDC ka United Democratic Party (UDP) na Mairang uwa man leh u kyrtong ka Khasi Hills Democratic Alliance (KHDA) u Equator Nongrang da chah jied u khlem iwon iwon i pynyoo bor kam u Deputy Chairman ka Khasi Hills Autonomous District Council (KHADC).
Ka Pro-tem Chairman, ka Teilinia Thangkhiew da pynbna ko wa u Nongrang da chah jied u hadien wa ran dien noh u kyrtong ka People’s Democratic Alliance (PDA) u Morningstar Mawsor ha chwa wow sdang ka dorbar jied Deputy Chairman.
Neidaw wa ran dien u Mawsor na i pynyoo bor da sakhi leh wa waroh ki 12 ngut ki MDC ka PDA da pep ki wow chong ha ka dorbar hanlada kattu katni ngut em ki hapoh ka yungkrehkaam ka KHADC.
Ha kani ka dorbar jied Deputy Chairman 2 ngut napyrdi ki 17 ngut ki MDC na ka KHDA leh ym em wan ki wa kynthup ya u MDC ka Hill State People Democratic Party (HSPDP), u Samlin Malngiang, uwa man leh u montri ha ka sorkar jylla wa u MDC samen ka KHNAM, u Adelbert Nongrum.
Hawa klam ha ka dorbar, neiliang u CEM ka KHADC, u Hispreaching Son Shylla da ong u wa i pep wow wan dorbar ki MDC ka PDA ym toh iwa yoosuk neibhah da poi ki hadooh ka pchem ka KHADC tangwa ym bien ki u psiah cha ka dorbar.
Da ong u wa kani toh ka sien ka wa ar wa ki MDC ka PDA da pep ki u chong ha ka dorbar, wei chwa ini da pep wan ki wow jied ya u CEM wa thymme ka Council kawa pynman ha ka 13 tarik uni u bnai.
U Shylla da ong u wa ini i pep ki MDC ka liang pyrchah pynyoo ko wa ki MDC ka PDA ki tieñ ki wow pdiang yei chah rem wei ini i leh ki da pynsih dur ko ya ka kaam saiñ pyrthai.
Discussion about this post