U Sarbananda Sonowal uwa da yoh wow man kam u Montri ka sorkar pyrdi wa pait ya ka chnat Ports, Shipping & Waterways wa ka AYUSH ini wa dep hawa pynkylla chuki u Modi ya ki Montri yong oo. Ynne ka sngi won da pynbna ya oo kam u MP ka Rajya Sabha na Assam hadien wym em kiwi ki kyrtong wa thap pyrtuid wow yaleh neibynta kani ka chuki MP.
U Sonowal da chim u ya ka synrot kam uwa jop ynne ka sngi na Assam Assembly Secretariat wa em ha Dispur deiwa synraan lang u Chief Minister ka Assam, u Dr. Himanta Biswa Sarma, u State BJP President, u Bhabesh Kalita wa u Water Resources Minister, u Pijush Haarika
U Sonowal da thap pyrtuid u neibynta ka Rajya Sabha ha ka 21 tarik uni u bnai wei da booh tarik ha ka 04-10-21 yow thap Vote.
Kam wow pynkynmoo wa ha u 2016, u Sonowal da jop u kam u MLA na Majuli heiwa da man u kam u Chief Minister ka Assam. Ha uni u snem da jop biang u kam u MLA tangwa da ieh u ya ka chuki Montri Rangbah yow ksoh noh da u Himanta Biswa Sarma wei hadien ini da thung noh ya oo kam u Montri hapoh ka sorkar u Modi. Tangwa yow neh kam u Montri ka sorkar pyrdi emkaam u wow man kam u dkhot ka Lok Sabha lane Rajya Sabha hapoh 6 bnai heiwa da yohlaad u ya ini deiwa ieh noh u MP ka Rajya Sabha u Biswajit Daimary uwa man leh u MP ka BJP uwa katni da man kam u Speaker ka Assam Legislative Assembly.
