U montri ka chnat bordiñ ka Meghalaya u James Sangma ynne ka sngi da e u ya i jubab wa bniah hajrong i pynbaad baam-tooh da ka Congress hawa pynkrehkaam ya kiwa boon ki kaam da ka Meghalaya Energy Corporation Limited deiwa pynbaad kylla wa ka Congress leh ko ya ya ki kaam Politics wa khutia mutia.
Hawa klam hajrong ka poisa wa da kyrchaan da ka Asian Development Bank neibynta wow booh yaki Smart Meter, u montri ka chnat bordiñ da ong u wa ka liang pyrchah da kylleiñ ki yei sakhiat yow pynsñiawthooh bakla ya ki padbah.
“I e poisa daka ADB toh ka ram wa e cha ka sorkar pyrdi heiwa ka sorkar da bahkhlieh ko ya kani ka ram kawa da e won cha ka sorkar jylla kam ka Grant naka sorkar pyrdi. Ini da man ko wa ym em i kit ram da ka jylla neibhah yei kitkhlieh da kular daka sorkar pyrdi,” da ong u.
Heiyatoh won wa i khut Tender wa da pynbaad toh kawa jied chwa ya kiwa toh u yoh kreh, da ong u wa da em du kawi donhi na kiwa thap Tender kiwa ye u pynhun ya waroh ki kyndon wei da leh ya ini deiwa bood ya ki kyndon iwa ini da chim por hadooh 6 bnai.
Da ong u leh wa i lut wow leh ya ini i kaam da pynku da 18% neidaw wa da pyntam sa 1,05,000 tylli ki Dual-Mode Hybrid Smart Meters na iwa da mang chwa.
Heiyatoh won wa i mynjur namo i Non-approval ya ki Funding Agency neibyta ka Phase 1 wa Phase 2 ka Deendayal Upadhyaya Gramin Jyoti Yojana (DDUGJY), da ong u wa yaka mang poisa da dep mynjur da ka Rural Electrification Corporation (REC) kawa man ka Funding Agency.
Hajrong won i pynbaad wa ku dor i chna yaka Ganol Hydroelectric Power project, u James da pyntip u wa nyngkong yaka DPR da pynkhreh ha u 2007 da ka Congress wei toh ka wym biang wei i thooh bniah ya i thaw wow chna leh da pynyoo wa em i wym biang heipor ka Congress iwa da kdaw nadooh itu i por heiwa u Contractor da chem u yaki moo ki wym skem iwa pynyoo wa nadooh itu i por leh da chem chitom heiyatoh wa i thaw.
Heiyatoh won waka Saubhagya Scheme, da ong u wa da em artylli ki Company kiwa da yoh yeini i kreh kawa da leh lyngba ka Online e-Tendering katkam ki kyndon ka sorkar pyrdi.
“Waroh i dor wa da booh iwa duna dooh da dep wow pynsakhiat daka Agency ka sorkar pyrdi wei du hadien ini da e yaka LOA (Letter of Award) da ka sorkar jylla,” da ong u.
“Heiyatoh won wa i dor ki mar katkam wa da pynbaad da uwa yahkhmat ka liang pyrchah, toh u kynmoo wa kani ka kaam toh ka wow chna hi da kiwa yoh ya ini i kreh (Turnkey Contract) wei i dor yong waroh i kreh namo ka BOQ (Bill of Quantity) toh kawa da dep bichaar bniah da ki Agency ka sorkar pyrdi wa ki bru wa chem phang (Expert),” da ong chooh chooh u.
Khaddooh won heiyatoh wa i chisien maap ya ki karkhana, heiwa ka liang pyrchah da kam ko wa daw dooh nong ka chnat hadooh T. 700 klur, u James da pynche u wa ki karkhana sah ram ki T. 180 klur kamtæ i kam ka liang pyrchah man ko iwa ym ye u man.
“I pynbait da leh heitæ i rukom wa daw leh suki suki wei yow ye ka jylla wow yoh ko yeiwa da dooh ko, da e laad yaki karkhana heitæ i rukom wow wan ki chakhmat kiwa ym su da slem,” da ong u James.
