Jubab u Paul yei chah pynbaad wa wiar ki File ka chnat wa pait u

Shillong: U MDC ka Jaiaw uwa man leh u Executive Member warim ka KHADC uwa pait ya ka kaam khayi pateiñ da kynthah u ya u CEM, u Latiplang Kharkongor wa ya u Chairman ka KHADC, u Pynshngain N Syiem, hadien wa neiliang kini ki MDC ka UDF da pynbaad ki wa da wiar hadooh palat 100 tylli ki File ka chnat Trade ka KHADC wa i sai poisa kawa da poi kamwa T.10 klur da ka Executive Committee wa yahkhmat da ka UDA.

Hawa kynthah ha ka Facebook neidaw wa em u cha baar na Shillong, u Paul da ong u, “Sa katwon sien u yalehke phi yei im ki paidbah ka Meghalaya neibyta i myntoi ka kaam yong phi? I pynbaad yong phi na ka pchem u lok yong phi, u Latiplang, u CEM wa thung hieh ka KHADC da ka liang kawa khian paaid yong ka yung, da booh boon ki phang kylli wa ki jubab.”

Hawa jubab kylla ya i pynbaad ki MDC ka UDF, u Paul da ong u, “Kammon u Chairman uwa toh u pait uwa man leh u khlieh ka chnat Legislature, u klam u cha ki laad pathai khubor deiwa chong lang wa u CEM ya ki kaam ki jaam kiwa toh ki kaam yong ka Executive.” Deiwa pynrap chooh chooh, “Ini pynyoo i wa me ym toh u Chairman tangwa u CEM wa kam næ khlem chah thung ne u De Facto CEM ka KHADC.”

Hajrong i pynbaad yong ki wa wiar ki File, u Paul da ong u wa ym em kawi leh ka File kawa wiar naka miej yong oo.

Related posts

Dang jan u lai na Shillong cha Vietnam, Thailand, Laos, Cambodia wa Burma bar cha Delhi: Conrad

November 14, 2024

Pynbna ka VPP ya ki kyrtong MDC ha ka JHADC wa KHADC

November 13, 2024

“Ki dang em ki haka bichaar bniah wa ha i pyrkhat yong nga, hawa phi pynkhih phi ya ka EC na ka bynta ki daw wa phi da tip lut,” da ong u Paul.

Da ong u wa lada tip ki næ ym em wa ha ka sien wa nyngkong ka chnat Trade ka da wanrah ko ya ka rukom krehkaam Register ya i lai ki File yow pyntikna wa ym em kawi leh ka File wa wiar kamwa da jia ha ki por nachwa.

U MDC ka UDA da kylli u leh ya kini ki arngut ki MDC deiwa ong, “Wa lada tip ki namo ym tip ki wa da sdang ya ka krehkaam da ki Computer næ Computerisation ha ka chnat Trade wow pyntikna yow em ka khooid ya ki kaam ki jaam ha ka por wa biang ha ka rukom kawa che wa kawa khooid? Tip hi phi wow mutdur wow leh ya kini ha kini ki snem waroh wa man phi kam u CEM, EM wa sa kiyi de?”

“Iyi wow jia kattu heiyatoh wow Register ya kiwa chongdai madan wa ka khynra ya kiwa dai madan pyrchah yaka aiñ ha ki thaw wym yoh bor? Ka 30 tarik Khonchonglad (Nov) toh ka tarik wa khaddooh ya kiwa dai madan wow pynpsiah pyrtuid, iyi wow jia won?” da kylli chooh chooh u Paul.