Ka 6th Schedule ym ye ko wow yada ya kiwa na baar, hap yaleh pyrchah yaka CAA cha Supreme Court: Samuel Jyrwa

Ka North East Students Organisation (NESO) da pynman ko yei yakhih pyrchah ha waroh kawi ka thaaiñ North East neidaw wa ka sorkar India da pynkrehkaam ko ya ki kyndon (Rules) wow krehkaam noh ka Citizenship Amendment Act, 2019 (CAA) ha waroh kawi ka ri India.

Ha Shillong ka yakhih da pynman hakhmat u mot yong ka seiñ KSU uwa em ha Lachumier, heiwa neiliang ki dkhot ka NESO wa kynthup ya ka Khasi Students’ Union waka FKJGP kam i dak pyrchah da thang ki ya ki kyndon ka Citizenship (Amendment) Rules, 2024 kiwa da pynbna da ka sorkar ynnin ka sngi kiwa hap u bood hawa pynkrehkaam yaka aiñ CAA.

Tangwa ka sorkar hawa pynbna yaka aiñ CAA, da thoh ko ha kani ka aiñ wym krehkaam ko ha ka jylla Assam, Meghalaya, Mizoram wa Tripura kamjooh ki thaw wa haap hapoh ka Sixth Schedule deilang ki thaw wa pynkrehkaam yaka Inner Line Permit (ILP).

Neiliang u Chairman ka NESO, u Samuel Jyrwa da ong u wa hanla ka sorkar India da pynbna ko wa ki jylla wa em ka Sixth Schedule wa kiwa em ya ka Inner Line Permit u lait ki na ini i pynkrehkaam yong ka CAA, tangwa i maa yaka jylla Meghalaya da yang ko neibhah ha kiwa boon ki bynta yong ka Assam ka CAA krehkaam ko wei lada ka Assam chah ktah ko, kiwi ki jylla ka thaaiñ North East leh u chah ktah lang ki.

Related posts

Dam noh ka NPP wow kyrchaan ya ka sorkar ka Manipur wa yahkhmat da ka BJP

November 17, 2024

Wa thung ka BJP da ki bru yong hi tæ mih i kynrum kynram ha NEHU: Ronnie

November 15, 2024

Da ong u wa kamwa da yoo wa ka Sixth Schedule ym ye ko wow yada yei wan psiah kiwa na baar deiwa ong wa lada toh wa ye ko ileh wa boon ki baar jylla hadooh kat deini, wei ileh ym ye ko wow yada waroh chi kattu.

U heh dooh ka NESO da ong wa kam ki seiñbhlang ym lai de ki wow yaklam waka sorkar India hajrong ka CAA, tangwa ka yaleh u pteiñ bait ko ha ki luti ki syngkieñ wei ka NESO daw yakhun ko leh pyrchah ya kani ka aiñ ha Supreme Court.

Neiliang u President ka KSU, u Lambokstarwell Marngar da ong u wa ka KSU u yieñ bait ko ha ka jooh ka yurim wow pyrchah neibynta ka jylla Meghalaya, wei ka KSU daw chong pyrkhat ko kammon u pynsñiaw cha ka sorkar jylla.

Hajrong i pynbna wa da pynlait yei krehkaam ka CAA ha ki thaw Sixth Schedule, da ong u wa ini toh du wow pynbiej neibhah lada ktah yaka Assam daw ktah leh ya ka Meghalaya.