Ka montri rangbahdooh ka Bangladesh, ka Sheikh Hasina da ong ko wa ym sñiawthooh ko yei emkaam ya ka aiñ Citizenship Amendment Act yong ka ri India heiwa da sñiaw ko wa kani ka aiñ man ko kawa ym emkaam.
Da pynrap ko leh wa ka CAA toh i kaam pohyung yong ka India wei ymtip ko neiyi i daw wa pynman aiñ ka India ya ka.
Ya ka CAA da pdiang wow man aiñ ko da ka Parliament ha ka 11 Kmaichonglad 2019 heiwa elaad ko wow man tre ri ki bru wa ngait niam Hindu, Sikh, Buddhist, Jain, Parsi wa Christian kiwa da yut na Pakistan, Bangladesh wa Afghanistan nei chah lehbeiñ chwa u Kmaichonglad u 2014.
Kam wow pynkynmoo heini da pynbna ya ka thup NRC ha Assam heiwa mih pyrtuid ki palat 19.96 lak ngut ki bru kiwa chah kyntait.
Neiliang ki chipai yada pood ka Bangladesh namo ka Border Guard Bangladesh wa ki pulit ka Bangladesh da ong ki wa da kem ki ya 300 tam ngut ki bru kiwa da psiah tooh cha Bangladesh na India ha u Khonchonglad wei da phah kset ya ki cha ki thanat ha Jhenaidah wa Jashore.
Kini kiwa chah kem da kam ki wa toh ki tre ri ka Bangladesh tangwa ymye ki wow pynyoo ya ki sabut wow pynskem yeini i kam yong ki.
Heiyatoh wa i chah beh ki bru na India cha Bangladesh, u montri ka kaam baar ri (Foreign Minister) ka Bangladesh, u AK Abdul Momen da ong u wa ka Dhaka da paan yutip ko na Delhi chaphang ki nong Bangladesh wa sah tooh ha India.
Da ong u leh wa lada kini ki bru wa psiah cha Bangladesh ymye ki wow pynsakhiat yei man tre ri (Bangladesh) ki tæ daw pynuiñ biang ya ki.
Discussion about this post