U Marki Mulieh uwa man kam u kyrtong MDC ka UDP naka 18-Jowai North uwa man leh u MDC wa da rem ha u 2019, hawa klam cha kiwa thoh khubor hadien wa dadep thap pyrtuid neibynta u yakhun Election biang, da ong u hei chem yong oo kam u bru wa jooh em ha ka District Council wa em chiboon kiyi kiyi wa hap pynbait yei eh i khoo ka Council la heiyatoh waka poisa poilaiñ wa kiwi de.
Ong u wa em chiboon i pynemkaam bakla heiyatoh waka poisa poilaiñ, i wym tikna i rukom pynkrehkaam yaki Scheme, ki Audit Report wym man de kiwa bait wa biang wei hadooh kini ki snem leh wym pu ye ki u pynbait yeini.
Wei ha u snem 2018 wa em khaddooh u hapoh District Council da sdang u wow yoolut yei duna wei yeitæ daw batai che u neini chakhmat haki yalang paidbah.
Khana haroh u wa ka District Council katni em ko i tyngkhooh ka aiñ wa chyrkhei bha kawa tip ka “Forest Conservation Act” wa dang dep mynjur hapoh ka Parliament ha u 2023 wei da pynkrehkaam (Adopt) da ka sorkar jylla katni.
Hapoh kani ka Forest Conservation Act da booh ko hei maa yaka District Council næ ka Sixth Schedule neibhah da em chiboon ki bor wa da knieh noh naka District Council.
Ha kani ka aiñ emkaam chiboon i ya pyrkhatlang wei lada jop u daw pynsñiaw u cha ka sorkar jylla waka sorkar bei hajrong kammon u pynlait ya kani ka aiñ hapoh ka District Council, neibhah hapoh kani ka aiñ i e NOC hapoh ka jylla ka District wym em de i yaphyllu wa ki paidbah, heiwa da e bait daka sorkar bei.
Kamtæ lada ka sorkar bei chim bait ko i bor haka yei khyndaw u chyiap, ki khloo, da man wa i kam kiwa im ha kani ka thaaiñ daw chah beh i nei thaw yong i hi wot hawa em i ka hok mantre.
Sa kiwi won ki mat ong u lada poi u hei thong, daw pynkrehkaam ya ki dak thoh Pnar kamwa dadep mynjur ka JHADC, wei wow pynkhlan leh i rukom chakri ya u paidbah khnang yow yoh ki yei hok hei por wa biang.
Discussion about this post