Ka NPP hawa e yei jubab hadien wa pynbna ka AITC Meghalaya ya 10 tylli ki kular wow pynkrehkaam lada yoh u chna sorkar, neiliang ka NPP da ong ko wa katwa ka AITC dang e kular ko, ka NPP won da dep ko wow e yeiwa da kular.
Da ong wa kiwa yahkhmat ka AITC heipor wa em ki hei bor nadooh u 2010 hadooh u 2018, ym em sñiawthooh ki yei chitom ki paidbah wei ym em hi bna ki ki leh.
Ka sorkar wa yahkhmat da ka NPP nadooh u 2018 hadooh u 2023 da wanrah ko ka Scheme yarap ya ki warep kiwa heh dooh hapoh ka FOCUS wa FOCUS+ katwa ka AITC won dang kattæ sdang ko wow kular iwa ka NPP da dep booh thong ko wow pteiñ yei yarap neibynta ki 10 snem wow wan.
Ka NPP da ban joor ko wa ki kular ka AITC toh du lyngba ki “Baki Card” wei boon ki bru ka Meghalaya da kyntait ki yeini i thap pyrtuid deiwa thok kamjooh ki kular thok deiwa kaam wa boon bha ki bru kiwa da thap pyrtuid tangwa da pynjoor du da ki Advertisement donhi.
Ka NPP ong ko wa hapoh i yahkhmat u National President, u Conrad K. Sangma, hapoh ka FOCUS wa FOCUS+ da yoh myntoi 3.1 lak ngut ki warep.
Da kdaw leh wa ha kini ki 5 snem da pynku kyrdan ya 330 tylli ki Integrated Village Cooperative Society hapoh ka sorkar MDA, da booh 300 tylli ki Collective Marketing Centre wa 50 tylli ki Farmer’s Market ha kylleiñ ka jylla wei hadooh katni da em 1,00,000 tylli ki manyung wa da yoh myntoi lyngba ki kaam yarap ka sorkar wa yahkhmat da ka NPP.
Kamtæ da ong wa i kular ka TMC ya ki warep toh kiwa kamtu donhi ki wym em yillu neidaw wym tip ki iyi iyi chaphang ki warep hapoh ka jylla wei kini waroh toh ki kular yow yoh u mih khubor donhi.
Chooh chooh da kdaw wa ha u 2010 hadooh 2018 ki warep ka jylla ym jooh em yoh kyrchaan ki naka sorkar, da chah pyndooh ka Subsidy wa ki sboh deiwa kam wow pynkrehkaam ya ka rep khlem dawai sboh namo ka Organic Farming iwa da ktah bha yei kamai kajih ki warep.
Hapoh ka sorkar MDA da sdang boon ki kreh najrong ka FOCUS wa FOCUS+, i pynbiang ya ki yaaw ki haat wei wow pynkhlan i rep ya ki mar wa syad dor kam u chirmit, syiñ, Coca, Vanilla lyngba ki Cooperative wei da wanrah leh ya ka Organic Agriculture Policy yow pynrep hei thaw wa heh 15,000 Ha deiwa yoh kreh ki 15,000 ngut ki warep wa ki 28 tylli ki FPC.
Da sdang leh ya kiwa boon ki Mission kam ka Mission Lakadong, Honey, Spice, Mushroom wa Jackfruit. Da sdang leh ya ka Piggery Mission kawa heh dooh hapoh ka ri deiwa mang poisa T. 209 klur yow ye u pyndap yei emkaam doh sniang hapoh ka jylla. Da sdang leh ya ka Meghalaya Milk Mission kawa da pynkrehkaam deiwa mang T. 215 klur.
Da pynkut deiwa ong wa ki kular ka TMC ye wow ngait lada ki heh yong ka wa em ha Kolkata ye ki wow yarap ya ki warep kiwa em ha Bengal chwa wow pyrchang ha Meghalaya. Wei da pynkynmoo leh yei kaam khayi tooh ya ki masi ha Bengal wa emkti u heh ka TMC u Anubrata Mondal kawa da poi da ki boon klur tangka.
Puræ leh: 10 tylli ki kular wanrah ka TMC neibynta ka Meghalaya lada yoh u chna sorkar
