Uwa e ktien ya ka All India Congress Committee (AICC), u Gaurav Gogoi da ong u wa ki paidbah ha kani ka kynti daw yoh ki ya ka laad wow yoo yei durkhmat wa thymme kam ki kyrtong ka Party neibynta ka Election MLA ha Meghalaya.
Hawa yaklam wa kiwa pathai khubor, uni u heh ka Congress da ong u wa ki paidbah da yoo ki boon ngut kiwa mihkhmat kiwa kynthiar na kawi ka seiñ cha kawi tawon wei heipor Election kini ki jooh ki bru lai ki cha ki paidbah wow kular da ki phaw jait ki kreh kiwa ymye ki wow kreh.
Chooh chooh kini ki heh ka AICC wa kynthup ya uwa e ktien uwa man leh u MP, u Gaurav Gogoi ryngkat kiwi kiwa yahkhmat da wan ki cha Shillong wow bichaar yei pynkhreh ka Party neibynta ka MLA Election. U Gaurav Gogoi da wan u leh cha kani ka jylla kam u Chairman ka Screening Committee wow bichaar ya ki kyrtong kiwa ka Meghalaya Pradesh Congress Committee da phah ko cha ka AICC.
Heiyatoh wa i wanrah ka Trinamool Congress ya ki kular lyngba ka WE Card wa ka MYE Card, u Gogoi u da ong u wa kini ki jooh ki seiñ da lai ki cha kiwi ki jylla da i jooh i thmu wow pynlut boon ha ki Advertisement, tangwa boon na ki kyrtong yong ka da rem kput ki deiwa pynrap wa kam kini toh u e laad wow pynlut ke ki ya ka poisa.
Da beiñ u leh ya ka BJP, heiwa da ong u wa i rukom pyrkhat man i mar dei kangtleiñ wa ka BJP, neibhah u Rahul Gandhi lyngba ka ‘Bharat Jodo Yatra’ da klam che u wa waroh man ki kamjooh hakhmat ka aiñ lada u Hindu næ Christan tangwa ym toh kamwa da leh da ka BJP deiwa pynkynmoo wa chwa ka Christmas u 2022 da phah takit katwon ki yungmane wa em ha Assam, katwon ngut kiwa da kylla niam wei ini pynyoo ko wa ka BJP ym ngait ko ya waroh i ngiat yong kiwi.
Heiyatoh wa i pynemkaam yong kiwa boon da ka poisa heipor Election, u Gogoi da ong u wa ka Congress da yoh ko yei jop ini wa dep ha Himachal Pradesh deiwa pynrap wa ka BJP da pyrkhat ko wa da ka poisa daw yoh ko yei jop, ka Congress da pyrkhat ko wa da ki kaam wa da pyndep u jop Election. Da ong chooh chooh u wa lada nujor ya ka sorkar wa katni, ka sorkar wa yahkhmat da ka Congress rap biang ko neibynta ka mynried ka jylla Meghalaya.
Hajrong i kam yong ka BJP wa ym em wa ye u chna sorkar thymme hadien ka Election khlem ka BJP, u President ka Meghalaya Pradesh Congress Committee (MPCM), u Vincent H Pala da ong u wa ini i klam da pynyoo yei dak wa ka BJP da pyrchang ko wow maham ya ki paidbah ka jylla Meghalaya wei ki paidbah toh u e ki yei sneiñ ya ka BJP kamwa da leh ha West Bengal.
