U Montri Rangbah ka jylla, u Conrad K Sangma da ong u wa i thut hapoh ka Party Bharatiya Janata Party (BJP) Meghalaya, toh ki kaam yung kiwa hap wow pynbait hi da ka BJP.
Ka BJP kawa em 2 ngut ki MLA ha ka jylla wei kawa ya krehlang ha ka sorkar synrop Meghalaya Democratic Alliance (MDA) wa yalam da ka NPP, tangwa i sdang piah ha ka BJP Meghalaya da mih pyrthai i hadien wa kynthah yaka sorkar da u President ka Party, u Ernest Mawrie, iwa da pynman leh ya kiwa kitkaam ka BJP wym sñiawsuk yeiwa leh u Mawrie deiwa dawa leh wow pyndam noh ya oo kam u President.
Neidaw wa joor ini i pynbaad pyrchah yaka sorkar, neiliang uwa e ktien ka MDA uwa man leh u Symbood Montri Rangbah, u Prestone Tynsong da klam u deiwa khor ya ka BJP wa ka toh u mih noh ko na ka sorkar lada ym hun wow ya krehlang.
Hawa kylli ynne ka sngi, neiliang u Montri Rangbah uwa man leh u President ka NPP, da ong u wa i kaamram yong oo toh wow ya krehlang wa waroh ki seiñ saiñpyrthai kiwa ya synrop ha ka sorkar, deiwa ya syllok wa ki MLA, tangwa hawa yatoh wow i thut ha ka BJP da ong u wa toh i kamram yong ka wow pynbait.
