Shillong: Uwa e ktien ka Congress uwa man leh u MP na Assam, u Gaurav Gogoi da beiñ u ya sorkar NDA wa yahkhmat da ka BJP kawa man ka tnat ka RSS neibhah wa ha kini ki soo snem ym em u leh ko iwon iwon neibynta ki paidbah lait noh du ya ki phang krehkaam ka RSS.
U Gaurav da ong u leh wa ka BJP ym em burom ko ya i man kyrpang ki paidbah ka jylla Meghalaya la ha ka riti dustur namo i ngait.
Da ong u wa ka BJP sñiawthooh ko wa ka ymye ko u soohthied ha kani ka jylla wei pyrchang ko wow psiah na dien deiwa pynemkaam da ki party kiwa em ha kani ka jylla chirup wa ka NPP.
“Man i iwa phylla wa ki seiñ ri-loom man ki kam ki luti nadien wow psiah ka BJP wa ya u Amit Shah, u Yogi Aditya Nath wa kiwi kiwi cha kani ka jylla kam ka NPP,” da ong u Gogoi.
Da ong u wa ki paidbah toh u sñiawngooh ki yei man kyrpang ka jaitbru wei ymtoh wow elaad wow psiah ka BJP cha kani ka jylla wow wanrah ya i kylla.
Da beiñ u ya u president ka NPP, u Conrad K Sangma deiwa ong wa ymye u wow yaklam neibynta ka Visa yong u President ka World Baptist Alliance katwa da kular u wa lada ka NPP wan ko hei bor daw wai ko ka laad ya ki kaam pynroi.
Da pynbaad u wa i wan ki heh ka BJP dei langær cha ka jylla toh du wow theh ya ka poisa wow thied Vote.
“Pait ya i rukom thung ya ki Vice Chancellor, ki Governor wa kiwi ki kaam waroh toh ki bru kiwa mih na ka RSS ym katkam ka kyrdan wa em ki,” da ong u Gaurav.
Discussion about this post