Shillong: U President ka Bharatiya Janata Party (BJP) Meghalaya Unit, u Ernest Mawrie da ong u wa ka BJP u pteiñ ko wow dawa bait da ka takit CBI hajrong i pynemkaam bakla ya i bhah yong ka sorkar pyrdi ha ki ar tylli ki District Council, ka Garo Hills Autonomous District Council (GHADC) wa ka Jaiñtia Hills Autonomous District Council (JHADC).
Da ong u wa ka BJP ym chong hi-eh ko lane u pynwiar hi-eh kamtu ya ka baam-tooh wa da chem ha ki ar tylli ki Autonomous District Council (JHADC/GHADC), neibhah ka thong yong ka Party toh wow pyndooh jait ya i baam-tooh, deiwa ong wa i chim ya kani ka phang ym toh neibynta i Politics.
U Mawrie da ong wa ye wow man wa em em Party kiwa em ha ka sorkar synrop Meghalaya Democratic Alliance (MDA) wow chim da kamwi won. Da ong u wa i chem yei baam-tooh ha ki ADC ym toh deiwa chim na madan, tangwa da leh deiwa chem lyngba ka RTI wa ki kot ki sla kiwa biang.
Kam wow pynkynmoo wa hadien wa ka BJP da wanrah ko ya ki phang baam-tooh ha JHADC wa GHADC, da em ka thma ktien hapyrdi ka ka BJP wa ka sorkar MDA, kawa da pynman ya ka sorkar wow khut noh ya ka yalang ka MDA Co-ordination Committee ha u Khonchonglad (Nov) u snem wa dep, tangwa ha kani ka yalang ym em khut ya u President wa u Vice President ka BJP.
Hawa kylli, u Mawrie da ong u wa toh sakhiat wa ym em chah khut ha ka yalang yong ka MDA Co-ordination Committee, deiwa ong leh wa hanlada khut ki leh ym bien u wow lai neibhah ym bien ki wow yaklam hajrong ki baam-tooh ha ki ADC.
