Shillong: Katkam ki khubor wa da yoh lum, da yoh yutip wa u Union Home Minister, u Amit Shah ye u wow wan cha Shillong ha ka 23 tarik uni u bnai, tangwa hawa kylli na u President ka BJP Meghalaya, u Ernest Mawrie, da kyntait u ya kani ka khubor deiwa ong wa ka Party ym pu yoh yutip ko hadooh katni wei ye u wow yoh yutip manda lai u cha Delhi.
U President ka Bharatiya Janata Party (BJP) Meghalaya mynstep ka sngi daw mih u wow lai cha Delhi neibynta wow yaklam ya ki kaam wa jhan ka jylla, nadooh ki kaam pynroi wei khamtam dooh neibynta wow pynsñiaw hakhmat u Home Minister, u Amit Shah yow pynsmat pynkrehkaam ya ka Inner Line Permit (ILP) ha ka jylla Meghalaya.
Hawa yatoh won wa i pynbaad yong u MLA ka Congress na Mawlai, u PT Sawkmie wa ka sorkar BJP na Delhi ka leh chiliang khmat ko deiwa e ILP ha ka jylla Manipur, katwa ya ka jylla Meghalaya ym e hadooh katni wot hadien wa da mynjur ya ka Resolution hapoh ka yung dorbar chna aiñ, neiliang u Mawrie da kyntait u wow klam iyi iyi leh yei e ILP ha jylla Manipur, tangwa da ong u wa i klam yong u Sawkmie ye wow man i sñiaw samen yong oo, khamtam wa em u ha ka liang pyrchah neibhah toh i kaam yong ki wow pynbaad.
