15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1
Advertisement ad1

Ka Congress da dooh ko yei chaniah na ki paidbah: Gilbert Sten

0 Comments

Jowai: U Gilbert Sten uwa man leh kam uwi na kiwa yahkhmat ka Congress nachwa uwa e i chakri cha kani ka seiñ, ha kani ka kynti da psiah noh u cha ka party NPP hadien wa da chim u ya ka rai wow yaleh ya ka Election MLA na Mowkaiaw Constituency.

Hawa yaklam wa kiwa pathai khubor da ong u wa psiah u cha ka NPP toh neidaw wa kwah u wow wanrah ya ka roi ka paar wei da mih u leh u na Congress deiwa ong “Ka Congress toh neidaw wa da slem em ko hei bor da sdang noh ko u dooh yei chaniah ki paidbah wei ini toh wa leh kiwa em heibor synchaar.”

Da kdaw u leh wa hadooh kiwa kreh Party leh chem chitom ki u kreh hapoh i pyllai kiwa yahkhmat ya ka Party. Heijooh i por won da ong u wa i mih u na ka Congress ym toh wa em iyi iyi i daw leh, wei da leh u ya ini deiwa pyrkhat ya ki paaid ka Constituency kiwa da angnood wow yoh yei kylla, wei ka Congress ym ye ko u leh ya ini. Katwa haka NPP da yoo u wa em sakhiat ko i thrang wow wanrah ya i roi i paar ha waroh kawi jylla ka thaiñ mihsngi katkam wa kwah ki paidbah.

Da ong u leh wa ka Constituency wa yieñ u, boon ki chnong wa em ha khappood wa ka Assam wei chem chitom ki wa ym biang ki sarok wei ini da ktah ko ya ka rep ka riang wei lada yoh u wow man kam uwa mihkhmat daw pyntikna u wa ka NEC u chna ko ya u sarok wa biang deiwa krehlang chirup wa ka jylla Assam wa ka Meghalaya wei ini waroh daw pynchlur ko ya ki warep neibhah ki toh kiwa eh u yoh kreh sorkar.

Hei yatoh won wa ka puræ puthi da ong u wa dang duna ki skur wa ye u e ya ka puræ puthi wa paka cha ki khynnah wei ki College leh ympu em wa ye u e ka chakri cha ki paidbah wei boon hi haap mih ki na ka chnong yow thooh yei stat i tip.

Chooh chooh da ong u wa ka um baam um dih leh ym biang ko hanlada ka sorkar da pynlut ko da ki Lak ki Klur wei hadooh katni leh ym biang ko iwa da wanrah ya i boon i kjut ya ki paidbah.

Hei yatoh won wa ka kaam i chait i khiah da ong u wa ki PHC, CHC wa em cha kani ka thaiñ neidaw wa em ki cha ka thaiñ khappood, ki paidbah kyrchaan ki na kini ki thaw sumaar wa chna hi ka sorkar Meghalaya tangwa ki Doctor leh dang duna ki wa ye wow chakri ya waroh kamtæ emkaam waka sorkar jylla wow chna ko ya ki kyndon wym hoi u kyntait ya kiwa sah cha khappood.

Hei yatoh won wa i pynbait pood u ang waka jylla Assam ym bien u ong iyi iyi leh neibhah hadooh katni dang em hapyrdi i ya pynbait pood hapyrdi ki ar jylla tangwa oo won pyrkhat u wa kammon u wanrah ya ka roi ka paar ya ki paidbah wa sah ha khappood.

Ym bien u leh wow beiñ ya ka Congress deiwa ong wa “Ym ye u pynbaad wa ym em wanrah ko ya ka roi ka paar, tangwa katni won boi wa da slem em ko ha i bichaar, ki paidbah ye u man wa da ngiah ki yei rukom krehkaam ko wei katni i rukom krehkaam ko toh neibynta samen khamtam kiwa mihkhmat khamtam ki montri ymbien ki u wanrah i roi i paar ya kiwa im cha khappood”.

Da ong u leh wa ki kaam baamtooh em bait ki wei waroh da yoo ki ki iwa da man kam u moochynthut ya ka Congress wei ki paidbah leh daw e ki ya i sneiñ ya ki wei da yooluti u leh wa ka NPP ym chah ieñ ko ha ka jooh ka kjut.

Heiwa kylli won na oo wa chah ieh dien ka ri-loom Jaiñtia hei yatoh wa ki kaam pynroi pynpaar ha ka Congress da ong u wa ngait u wa man salonsar ko tangwa chong ko ha kiwa mihkhmat won wow wanrah ya ini waroh wei ym toh wa yaroh u ya ka Congress wei kiwa mih khmat hi pyrkhat ki du ya ka Constituency ymtoh ya ka district waroh kawi.

Previous
Next

0 Comments

Leave a Reply