Hadien wa yoo ha ki laad pathai khubor wa ka sorkar jylla lyngba u Symbood Montri Rangbah uwa pait leh yaka chnat Kaam Pohyung, u Prestone Tynsong da rai ki wow chna noh da ka Coordination Committee khnang yow em i yakrehlang wa ki bru wa chong chnong ha khappood, neiliang ka seiñ War Jaiñtia Students’ Union, (WJSU) Amlarem leh sñiawkmen wei sñiaw yahaap yumut hi ko ya kani ka rai ka sorkar wow em noh da kani ka Committee.
Tangwa ha iwi won i liang da ong wa kani ka Committee ymtoh u em ko ha Sub-Divisional Level neibhah lada ha Sub-Divisional Level ym ye ko u wanrah i sñiaw yajan hapyrdi ki chipai BSF wa ki paaid wa chong chnong kiwa em ha khappood.
Kamwa hei thoh wa da e ka seiñ cha u Assistant Commandant ki BSF, heipor wa yachem ko wa ki ha Muktapur haka 12 tarik uni u bnai deiwa e phah leh yei thoh cha u Sub-Divisional Officer ka Amlarem, ka seiñ hi pynsñiaw ko wa kwah wei angnood ko wa kani ka Committee toh u em ko ha man ki Assistant Commandant Level.
Itæ toh hapyrdi ki Border Security Force wa ki waheh chnong ka thaaiñ khappood kiwa haap hapoh i pait u Asst. Commandant.
Heiyatoh wa ini i e yumut ka seiñ da ong ko sñiawthooh yei emkaam u rap ye u pynyajan i yakrehlang hapyrdi ki BSF waki paidbah wa sah khappood toh deiwa em ka Committee ha man ki Assistant Commandant Level, da pyntip leh wa daw lai yachem ko wa u Symbood Montri Rangbah ka sorkar jylla uwa pait leh yaka chnat kaam pohyung neibynta u yaklam u pynsñiaw hajrong kani ka bynta.
Discussion about this post