theme-sticky-logo-alt
theme-logo-alt
Advertisement ad1
Advertisement ad1

Ka C&RD Block wa kiwi ki mat dawa u MLA wa MDC ka Nongpoh na ka sorkar

Ki ar ngut kiwa mihkhmat ka Nongpoh Constituency wa kynthup ya u MLA u Mayralborn Syiem wa u MDC, u Balajied Rani ynne ka sngi da lai booh ki yei dawa hakhmat u montri rangbah ka jylla neibynta i emkaam wa jhan dooh ki paidbah.

Hawa yaklam wa kiwa pathai khubor, u Syiem da ong u wa kam kiwa mihkhmat da pynsñiaw ki ha u Conrad K Sangma yei emkaam wa jhan kiwa chong chnong ka Nongpoh iwa kynthup wow sdang noh ya ka Umden C&RD Block.

Da ong u wa hadooh katni ka Nongpoh em ko du ka Umling C&RD Block, heiwa ka Nongpoh emkaam wow yoh sa ya ka C&RD Block wa thymme neibhah wa ka Umling Block man ko kawa heh wei kawa da sdang nadooh u snem 1998, wa kynthup 226 tylli ki chnong, palat 15,000 tylli ki manyung wei palat 81,000 ngut ki bru wei deiwa pynmih noh ya ka Umden Block daw ye u pynsuk ya iwa emkaam ki paidbah.

Kiwi won ki mat dawa toh wow pynkrehkaam noh ya ka Trauma Center neibhah ka Nongpoh em ko hapoh u sarokbah Shillong-Guwahati wow yarap ya ki bru kiwa mynsoo ha i tyrrah kari wei sa kawi tawon ka phang toh wow booh noh ya ka GNM Nursing School ha Pahamsyiem.

U Mayral da ong u wa kiwi ki mat dawa toh wow booh ya kawi ka COVID Hospital ha Ri-Bhoi District ka wow em ha Umran MCH Hospital, deiwa ong wa hadien wa pynkrehkaam ya ka COVID Hospital daw ye u booh ya ka Trauma Center ha Nongpoh Civil Hospital wow pynsuk lada em iwon iwon i jia wa sñiawsih ha u sarokbah.

U MLA da pyntip u wa da dawa leh ya u sarok Nongpoh-Umden-Sonapur Road neibhah uni u sarok da man uwa emkaam wow lai cha khappood ka Assam wei daw myntoi leh ki paidbah yong ki 135 tylli ki chnong wei daw yada ko leh ya u pood u ang ka jylla.

Share this:
Previous

Da chah wow wai ki dukan dai kiad ha Shillong

Next

Ym yahaap yei yakylliang thaw lada em i pynbait ya u pood wa ka Assam: Lambor