U Montri Rangbah ka jylla, u Conrad Sangma da pynksan u yei rai ka sorkar wow pynkrehkaam ya ka Code of Criminal Procedure (CrPC) waka Code of Civil Procedure (CPC) ha waroh kawi ka jylla hadien wa da mih i artatien wei kwah wow pynlait khamtam ya ki yung bichaar ki District Council na ini i pynbna.
U Conrad da pynche u wa chwa wow yabhah yei bor Kachari (Judiciary) na ki bor sorkar (Executive), ki ADC kiwa pait ya ka Judiciary da man ki leh kam kiwa bichaar namo ki Judge ha ki District Court katkam ka aiñ kawa nadooh u snem 1937 tangwa katni da rai wow pynkhlaad noh ya ka Judicial waka Executive wei da thung da ki Judicial Magistrate tangwa kani ka aiñ yong u snem 1937 ym em klam ko chaphang ki Judicial Magistrate neibhah da wiar ki ADC Judiciary deiwa pynkhlaad, wei da em noh da ki Judicial Magistrate.
Kamtæ yow e bor ya ki Judicial Magistrate da wanrah ka sorkar ya ini i pynbna yow ye ki Judicial Magistrate wow leh ya ki kaam wa jooh leh ki ADC.
Kamtæ da ong u wa ini ym ktah ko yei krehkaam ki District Council, ym knieh leh yei bor ki neibhah ym em wanrah ya kawon kawon ka aiñ thymme lait noh wow pynbna yei krehkaam namo ka Notification wei lada em iwon iwon i wym sñiawthooh, yei bor ki District Council Court ym ye wow knieh neibhah da klam che katkam ka Para 4 wa 5 ka Sixth Schedule.
Da kdaw wa ini da che wa ym em iwon iwon i tuklar lane i ya tyngkhooh wa ki aiñ lane i bor ki Kachari ki District Council wei u krehkaam ki kamwa jooh hi.
Da ong u leh wa ye u man wa em ki wym sñiawsuk ya ki kyntien wa da pynmih hapoh ka Notification wei yeini ye wow pynkylla tangwa ym emkaam wow pynlait ya ki District Council na kani ka pynbna neibhah ki da lait chwa ki neibhah i bor ki wan i naka 6th Schedule katkam ka riti synchaar ka ri.
Chooh chooh da pynche u wa ka CrPC waka CPC ym ye ki wow pynkylla yei bor ka Sixth Schedule lane wow pynthut yei kaam ki Kachari ki District Council.
