U National President ka NPP uwa man leh u Montri Rangbah ka jylla, u Conrad Kongal Sangma da ong u wa ka dan wa da chim da ka sorkar jylla Meghalaya neibynta i dor yong i Petrol wa Diesel toh iwa duna tam lada nujor wa kiwi won ki bynta ka ri India, heiwa da pyntip u leh wa hadooh katni ka sorkar da chim ko du 20% ka dan wei i daw toh wow pyntikna wa ki paidbah ka jylla ym maad ki yei eh hanla em i dooh nong wa khroo ya ka sorkar.
Hawa klam ha ka yalang yalap Election ha Umpling ynne ka sngi, u Conrad da ong u wa ka Liang Pyrchah yow boon ki paidbah kiwa pynbaad ya ka sorkar jylla hajrong i ku dor i Petrol wa Diesel da ong ki boon jait, tangwa da pynrap u wa em 3 tylli kiyi kiyi kiwa da pynman wow ku dor, wa kynthup ya i ku dor nadooh wa ka sorkar India da thied ko, i dan wa ka sorkar India da booh ko wa kiwi toh deiwa kheiñ ya ka Value Added Tax (VAT) wei ka sorkar jylla leh ym ye ko wow leh iyi iyi, wei neiliang ka sorkar da chim ko ya ka dan kawa duna palat ya kiwi won ki jylla.
Da ong u wa ha ki por wa chem yei eh na i wan ka khlam COVID-19, toh lyngba kini ki dan wa da ye wow pynlut ha kiwa boon ki emkaam, hanla kattæ leh, ka sorkar ka booh ko ya i dor wa khian dooh, wei da ong u wa i ku dor Petrol wa Diesel ym toh neidaw yong ka sorkar jylla, tangwa toh i ku dor ha ka pyrthai hi waroh kawi.
U Conrad da ong u wa ka sorkar daw bichaar bniah bha leh hapoh ka Kynhun Montri ya ini i ku dor phñiang kari ha ka jylla, khnang wow pynduna chooh chooh ya ka dan lada ye, heiwa da pyntikna u leh wa ka Meghalaya toh u man bait ko kawa duna dor hanla em i ku cha kiwi ki thaw.
