U Moonlight Pariat, kyrtong MLA ka United Democratic Party (UDP) naka 2-Jowai Constituency hawa klam paidbah haka rynsan yalap Election wa pynman daka UDP Jowai Circle ynne ka sngi ha yung Building ka Seiñraij Complex Jowai, ong u wa ka jylla hapoh kini ki 5 snem wa yahkhmat ya ka sorkar da ka NPP da nanghiar ko ha kiwa boon ki liang.
Heiyatoh wei kaam khayi mooyong ong u wot hawa ka NGT da khang ko leh tangwa ki Truck wa kylla cha luti won boon toh kiwa kit mooyong, hei sakhiat ka poisa wa jooh khrong dan na u mooyong toh ka bhah u paidbah yow pyndap pynbiang yaki yung krehkaam sorkar waphær wa i roi i paar, tangwa katni won da lai ko cha muna ki bru samen namo ki High Level katwa u paidbah won yap thngan u.
Ini da wanrah ko yei stang poisa yaka sorkar wei da mih ki awri awra wa boon jait haka jylla, wa wot kiwa sikai leh hap yakhih ki deiwa thiah ha sarok neidaw wym yoh tulop neitæ kiwa chah beh kreh wa kiwi.
“La bakla jied wa mihkhmat ha kani ka kynti, ka District Council ye ko u wiar ha iwon iwon i por,” ong u Moonlight Pariat.
Ong u man i maa lada pynjop yaka NPP neibhah lada dooh yaka District Council kawa pait yaka riti dustur, khyndaw u chyiap, ki paidbah daw dooh ki yei mantre. Neitæ i pyntlot bor yaka JHADC wa i pyndooh tulop ya ki wakreh toh i thmu u pynwiar jait yaka.
“Wot ki mar pohkhyndaw wada kyrkhu da u Blai ha kani ka dong ka thaaiñ yong i leh katni em ki hei maa neibhah ki bru na baar jylla tip lut ki waroh yei kordor ki mar hapoh ka thaiñ”, da ong chooh chooh u Moonlight.
U mooyong wa ki paidbah hei mut ki da jan lut u, tangwa u Moonlight Pariat khana u wa haka Report wa thooh bniah da ka Atomic Energy dang em sa 600 Milion Ton chapoh, iwa mut uwa da dep tih dang khajiak hi-eh lane dang chi rtap donhi.
U Moonlight Pariat kob haroh u wa lada ki paidbah jied ki yaka UDP, daw wai dwar ko neibynta u pynku yei yarong poisa yow imlang nadooh ki paidbah ka sorkar jylla waka District Council.
Hawa u Moonlight kyruiñ u cha ka Jowai Constituency ong u wa da chah yoobeiñ ko ha kiwa boon ki liang khamtam ka thaw noh jhep wa ha kini ki sngi da sakhi yei taroi ki jhep ha kylleiñ ka Jowai kamjooh ki soodong sookun ki rood sarok.
Ong haroh u wa kani ka sorkar da leh embor ko wot hadooh wada kyrriah ko ya ki yung krehkaam sorkar cha kylleiñ wei iwa maa katni wot ka yung krehkaam u DC leh ye ki wow kyrriah.
Ha kani ka sngi da yoh leh i klam na u MDC ka Shangpung, u J.Treilang Suchiang, u Baitlang Pohsngap, ka Robila Mylliempdah, u Marki Mulieh MDC warim ka JHADC wa kiwi hei sakhilang ki paaid wa kyrchaan ka UDP.
