Jowai: Hawa yatai hapoh ka yung dorbar ka JHADC ynne ka sngi hajrong ki kynrum kynram wa jia khak khak hapyrdi ka jylla Assam wa Meghalaya hawa yatoh wa i eh yong ki chnong haki thaaiñ khappood na i daw wym bait u pood u ang. U MDC ka Mynsngad Khanduli u Dawan Lyngdoh da khyrwait u yaka Executive Committee yong ka JHADC deiwa ong wa ka District Council toh kawa ksoh ya i khyndaw i chyiap wei kawa e bor yaki pata, ki Landholding kamtæ de em i bahkhlieh wow tuklar hajrong u pood u ang wei ym toh wow pynkit wow noh yei kitkhlieh du cha ka sorkar jylla.
Ya ini da ong u hadien wa da kylli yaka Executive Committee iyi i bynta wa da leh ko hajrong i yoh bor ka Assam wow toor cha u pood ka JHADC, wa kynthup yei chna yaka Battalion Camp, ka Forest Check Gate, i chna yaki skur, ki sarok, i taan yaki sainar bordiñ wa kiwi cha ki chnong khappood wa dang haap hapoh u pood u ang ka District Council, neibhah wa neiliang u EM In-charge u F. Bareh da jubab u wa ini i bynta toh kawa haap haka Inter State Border wei toh i kamram ka sorkar jylla wow chim yei kitkhlieh.
U Dawan da ong u leh wa hawa ka District Council dang kam ko ya iwon iwon i chnong wa haap hapoh u pood u ang yong ka, ym toh u mylliñ yaki paidbah. Hajrong ini da kdaw u wa ka chnong Artiang Sanphew toh kawi ka wym em u yohlaad de wow chimbynta haka Election MLA, MDC ini wa dep.
Kamtæ da kyntu u yaka Executive Committee wow chimkhia u booddien ya ini i kaam, wa hawa ong wa toh i thaw wa haap hapoh u pood u ang ka JHADC wei ya ki bru wym pdiang de wow em chapoh u pood u ang da toh u mih ki, neibhah lada e laad kamni cheiwon ka mynried yong ka jaitbru u poi ko.
Ha i jooh i por da ong u wa ki chnong khappood ki chah pynchitom ki ha kiwa boon ki liang wot hawa kit wa bah khamtam hawa chah kem haka sorkar Assam, ki paidbah hap ki wow su da ki lak chaneiñ, tangwa lada ka District Council u noh bait ko yei kitkhlieh cha ka sorkar jylla iyi wow jia ya i.
I chah lehbeiñ haki thaaiñ khappood ym toh kawa ke, lada jia wa ka sorkar jylla u pyrchang ko wow wanrah ya i roi i paar daw man ko i chah pynchitom ki bru ka thaaiñ wot ki tiar ki tar kamjooh.
Da kylli u leh wa hawa da yoo leh, u suki bait wei u yang bait yaka sorkar jylla, i kamram toh wow pynkhih nadooh ka District Council wow thoooh bniah yeiwa sakhiat, wa hawa kam wa haap hapoh u pood u ang yong ka Council toh u em ki kot wow pynsakhiat, ym toh u ya ksoh du ha i yaklam ktieñ wei i khana pateiñ la pateiñ.
“I em i i hok wow leh, lym kamtæ iyi i yumut wow man kam kiwa mihkhmat, ka Council toh kawa ksoh ya i khyndaw i chyiap tangwa wow noh cha kiwi ym yahap,” ong u Dawan Lyngdoh.
