October 3, 2015
0 Comments
Jowai: Ka kur Soo Kpoh Khat-ar Wyrnai ynnin i miet da dep pynman ko ia ka lehke droma kawa pyrtuid ‘Ong da Phi’ wa da thoh da u Dr. P. Syngkon uwa man leh kaam u president ka kur. Ia kani ka droma da pynman ha ka iung walieh ka kur ha ka dong Chilliang Raij dei thmu i pynmih poisa ia ka kur.
Ia kani ka droma wa sdang 9 waje i miet da chimwynta da ki dkhot ka kur donhi kam ki nongak deiwa emlang u R. Da oo Sakhiat Syngkon, D. Yoowan syngkon, R. Daoohimo Syngkon wa kiwi kiwi kam ki aktor.
Kani ka droma toh chaphang kawi ka statue wa chna uwi u bru kawa sdang u synchar ia i jingmut, i pyrtkhat iong Oo hadooh wa li booh u ka cha kawi ka thaw laike ki bru. Ha ini i thaw kani ka statue da sdang biang ko u ktah ia ki bru wa yoo ia ka heiwa da sdang ki u thied sula, thied sahkti ksiar hadooh wa em uwi da wanrah u da ka puri iow e jingim ia kani ka statue.
Manda kala bru kani ka statue da sdang kini ki bru u iaknieh u kam ka hadooh wa da hap wan da u syiem iow bichar ia uwon naki wa em sakhiat i mynsien maia ia ka da ki dak wa pynyoo ki ha ka ha i por dang man ko kam ka statue.
Kani ka droma da ioh ko ka bichar kaam kawa yoosuk wei wa em jingmut bha na ki paidbah wa wan peitke. Da e ko ia ki i jingsnein watoh ym hoi u yoobein ia kiwa kup chillang sem chilliang ha ijooh ipor leh u iada ia khynnah kynthai waroh.
