Ynne ka sngi da pynman ya ka Dorbar Mang Tangka ka JHADC, heiwa u CEM ka Council da wanrah u ya ka Mang Tangka yong u snem 2022-2023 kawa kynjoh T. 204 klur.
Hadien ini da elaad ya ki MDC ka Council wow pynsñiaw ki yeiwa chem ki hajrong kani ka Mang Tangka.
Neiliang u Lakhon Biam, MDC ka Nangbah da ong u wa kani ka Executive Committee ka Council man ko kam ka EC khonmynriw donhi ka sorkar jylla neibhah wa kat iwa thmu ko wow leh da chah khang da chah pynsangeh bait ha ka sorkar jylla.
Da kylli u leh, iyi myntoi wow man ki kam ka ‘Autonomous Body’ hawa dang tieñ dang chah pynlai ha ka sorkar jylla?
Heiyatoh wa i yoh ya ki Scheme na ka sorkar pyrdi da ong u wa ha KHADC wa GHADC, waroh ki MDC yoh ki salonsar i jooh katwa ha JHADC won ki MDC ka liang pyrchah won ym em u yoh ki wei da chah kyntait ki wow yoh Scheme. Da ong u wa emkaam wow sñiawthooh wa i myntoi u lai i cha ki paidbah ka Ri-loom Jaiñtia wei katwon u man iwa yoosuk hawa yoh ki chnong waroh ya ki kaam pynroi deiwa beiñ joor ya ka EC wa da leh ko kamni.
Neiliang u Holando Lamin da beiñ u ya ka EC ka Council neibhah wa tlot ware ko wow kreh ya ki kaam deiwa ong wa ki karkhana pynmih khyndawbilat da thied ki ya ki spah tylli ki Truck yong ki hi tangwa ka Council won ymye ko wow chim ya ka Trading License na kini ki kari ki karkhana iwa ye bha wow yarap ya ka yarong poisa ka JHADC.
Da beiñ u leh hajrong i tlot yong ka EC heiyatoh wa i thmu kær naar-chieh ha khappood waka Bangladesh iwa da dooh ki paidbah da ki hajar Acre ki thaw rep.
U Andrew Shullai leh da beiñ u ya ka Council hajrong i tlot bor ko wow pynmih poisa deiwa laitlooid khlem chah kdoh chah khoom.
Kiwi ki MDC wa da klam kynthup ki leh ya u Treilang Suchiang.
