Jowai : Ynne ka sngi man ko ka wow sah kynmoo hapoh ka chnong Jowai hei yatoh wow yada ya ki dakha wa em ha chi bynta ka wah Myntdu ha Syntu Ksiar heiwa da pynbna paidbah wa nadooh myntu da khang u khwe, u noh jar, u tong sasi nadooh na ka dam Mutong hadooh ka dam Syntu Ksiar.
Kamwow pynyoo dak cha ki paidbah ya kani ka Fish Sanctuary da chna da u mot ka Dakha Pnar uwa da pynwan dur da u ma Yoowan Syngkonm, wei da wan wai ya ka da u AA. Shullai, Deputy CEM ka JHADC ha ka yalang wa da pynman da ka Jaiñtia Fishing & Environment Protection Association (JFEPA) ha rood ka dam wa da chna da ka Soil & Water Conservation ha Syntu Ksiar ynne la sngi.
Ka JFEPA toh kawa da seiñ nadooh u snem 1993 wei da em ko leh 21 unit hapooh ri-loom Jaiñtia. U President ka seiñ u ma Lamwan Paswet ong u wa ka seiñ toh ym toh ka seiñ pynmih poisa kamtæ waroh ki kaam wa kreh toh du nei yoh yarap na ki tnat sorkar nadooh ka tnat Fishery, ka JHADC wa kam na ka Rotary Club Jowai. Da ong u wa ka seiñ neilaing yong ka da dep chna ko ya le tylli ki a dam ha ka wah Myntdu yow yarap pynkhooid ya ki jakhlai wa em ha ka wah. Da khang ko leh ya kiwa khwe da ki jaar, da ki bih wa kiwi kiwa ktah ya ki dakha.
Da kyntu u ma Lamwan ya ka JHADC wa ym hoi u e Land Holding Certificate cha ki bru ha ki thaw wa em ha rood ki wah neibhah kani ktah ko chiboon ya ka wah. Da pyntip paidbah leh wa katni ka seiñ da sdang ko u chna ya ka thawpaitke (viewpoint) harood ka Syntu Ksiar kawa chong dor 7 lak tam. Kani ka thaw paitke man ko kawa jrong kam 20 phut tam wei u kmai ko kamwa 10 x 10 phut. Iwa rap kyrpang toh wa hakhlieh kani ka thawpaitke daw booh ya ka slep wa tam (Cantilever) i wow poi hadooh jrong ka um yow yoh ki paidbah u ebaam dakha.
U A. Shullai uwa man leh kam u kongsan ha knai ka sngi da ong wa ynne ka sngi man sakhiat ko kawa sah kynmo neibhah boon tip ki wa hapoh ri-loom Jaiñtia joh joor kiwa tympiah tympra ya ki loom ki wah tangwa ynne ka sngi pynyoo wa dang em kiwa maya ya ka rymaw. Da kular leh u yakreh lang wa ka JFEPA yow yarap u pyndep ya u viewpoint wa kamjooh u chimkhia u ya kiwi won kiwa pyntia yow pood u ang charood ki wah.
Neiliang u Superintendent ka Fisheries u ma R. Rymbui ong u wa toh haap u burom i ya ki mrad kamjooh neibhah, ki leh em ki i thaw yong ki ha ka imlang sahlang. Neiliang ka tnat yong oo da dep pyllait ki hadooh 14 hajar tylli ki symbe dakha wa tip kam ki dakha soo chnat wei katkam i ong ki paidbah da roi bha ki ha kani ka wah.
U Dolloi ka Elaka Jowai, u ma Puramon Kynjiñ hei klam kam u symbood kongsan hei klam da ong u wa ki um ki wah ki khloo ki btap man ki kiwa da e kyrpang u Blai heidur ka Bei Rymaw tæ emkaam u yada i yaka.
Da pynkut ya kani ka yalang da ki ktien makhne na u General Secretary ka seiñ u ma N.K. Lamare.
Discussion about this post