Jowai: Ka Apiculture Mission toh kawi na ka skhim ka sorkar Meghalaya kawa da pynlai pyntoh da ka Integrated Basin Development and Livelihood Programme (IBDLP). Kani ka Apiculture toh kawa iarap ia kiwa ri ngap deiwa pynthymme ia i rukom ri-ngap kamwa ka juk wa katni.
Ia kani ka skhim da sdang ia ka ha u snem wa da dep ha u Naichiphaw, i thmu iong ka toh u pynboon ia i pynmih umngap, u pynchlur ia kiwa ri-ngap yow sdang ki u pynemkam ia ki stad saian wa em katni, kamjooh leh iow elad ia ki khynroo, khyllood kiwa ym em khih em khan u sdang ki da ka ri-ngap neibhah hapoh India ka iaw dai umngap toh kawa pynmih nong hadooh 20,000 klur chisnem, ong u B.K. Sohliya, OSD MIE uwa emlang ha kani ka ‘Workshop on Upgradation and Integration of Beekeepers in West Jaintia Hills’ kawa da pynman da ka Thadlaskein Enterprise Facilitation Center.
Da khana chooh chooh u wa ka umngap wa mih na Meghalaya man ko kawa kordor bha (Special Category) kawa dep pynsakhiat da ki boon ki thaw kiwa da dep test dep eksamin ia ka ha ki skur saian wapher wapher hapoh ka ri India. Tangwa ini ki kordor iong ini i umngap duna i lada khlan kiwa rep u siat dawai ia ki jhur wa rep ki. Ong u wa ki ngap manda dem ki ha ki syntu wa mih cha ki jhoor, ki taan lang ki wa ki dawai siat khniang (pesticide) wa em ha kini ki jingthung. Ini dawai khniang leh psiah ki cha ki umngap iwa pynhiar dor ia ki umngap kiwa mih na ka thain iong i. Ong u wa kat dang man i umngap iwa paka kat dang ye dor chooh chooh u dai chadooh cha bar ri ha i dor waheh neibah ki phareng khlan bha ka dawa na ki ia ka umngap wa paka neidaw wa ki boon da dam ki u pynemkam chini.
Ia ini i pyntngit ia ka umngap leh mih ko deiwa booh ia ki umngap hapoh ki tin wa jooh thap phniang bam neidaw wa i sap iong i phniang neh beit i ha kitu ki tin kawa pynkylla jaaw (acidic) ia ka umngap. Lada ioh, ia ka umngap toh u booh ha ki ksing steel lane ha ki klong bilor.
Ka Sata Ngap (Honey Comb) kawa boon ki por wa jooh noh ki bru leh kawa ye u dai neibhah na ka ye u chna mombati.
U ma T. Thangkiew, DDM, NABARD, Jowai da pynchlur u ia ki nong ri-ngap waroh u li mih ki cha ki bank wapher wapher kiwa ye u iarap poisa ia ki kaam ha ka Kissan Credit Card wa ka MUDRA Loan deiwa chna ki ia ki Self Help Group (SHG) lane ki Joint Liability Group (JLG) kiwa pynyoo cha ki bank wa toh wa chimkhia ki ia i ri-ngap. Pynkynmoo u ia ki leh toh u iatylli ki manda seiñ ki ia kini ki kynhun ym hoi u mih i sniawthooh bakla ha pyrdi iong ki iow man ka kaam iong ki kawa jop.
Ki nong ri-ngap ka kani ka sngi da ioh ki leh u booh ki jingkylli kiwa boon ha ki nongmihkhmat ki tnat sorkar wapher wa em ha kani ka sngi kiwa da ye ki u pynche ia ki ia kiwa boon ki bynta ka skhim wa ym em sniawthooh ki nong ri-ngap.
Ha kini ki bnai wa dang dep la 191 ngut ki nong ri-ngap da dep phah training ia ki ha Rural Resource and Training Center, Umran wei da dep sam leh cha ki 121 ngut ia ki ksing ri-ngap sorkar kiwa da chna katkam ka rukom ri ngap thymme kawa da dep ioh sikai ki.
Ia kani ka ialang ynne ka sngi da pynman ha Science Hall, Circuit House Jowai.
Discussion about this post