U MLA ka Hill State Peoples Democratic Party (HSPDP) uwa man leh u Montri ha ka sorkar MDA, u Renikton L Tongkhar da ong u wa ka sorkar India toh u klam che ko lada daw pynkrehkaam næ ym pynkrehkaam ya ka ILP hapoh ka jylla, neibhah hadooh katni i yooluti na ka sorkar pyrdi toh wow yoh noh yei mynjur yei dawa pynkrehkaam ya ka Inner Line Permit ha kani ka jylla.
Hawa kylli ynne ka sngi, u MLA da ong u wa ym ye wow tip iyi i rukom pyrkhat yong ka sorkar pyrdi hajrong i dawa ya ka ILP, wei ym ye wow ong wa ka sorkar India ka chimkhia ko næ ym em ya ini i dawa.
U Renikton da ong u leh wa lada pynkrehkaam ya ka ILP, toh u em leh ki kyndon wym ktah ya ki kaam uiñke suwari kamwa da pynsñiaw da u Lat ka jylla ini wa dep.
Da ong u wa ka Party ym sñiawsuk ko ya ini i pynslem yong ka sorkar pyrdi wow e ya ka ILP, khamtam wa ini i phang toh iwa da booh leh ha ka phang krehkaam Election yong ka HSPDP. Da ong u leh wa kamwa man katni, ka sorkar jylla da dep ko wow leh yei bynta wow mynjur ya ka Resolution dawa pynkrehkaam ya ka ILP, wei ym toh wow pynbaad ya ka sorkar jylla, tangwa iwa lyngngoh toh i leh yong ka sorkar pyrdi.
U Montri da ong u wa ka sorkar jylla katni ym ye de ko wow leh iyi iyi, lait noh du wow pyrkhat biang kammon wow pynsñiawthooh chooh chooh ya ka sorkar pyrdi wow e ya ka ILP, deiwa pynrap leh wa ya kani ka phang hap wow rah biang ha ka Coordination Committee yong ka sorkar MDA.
Hawa kylli chooh chooh, u Renikton da ong u wa lada ka sorkar pyrdi ym em thmu ko wow e ya ka ILP ha Meghalaya, toh u klam che bait na kiyi ki daw heithaw wow pynslem næ pynyang khnang wa ka jylla leh u ye ko wow pyrkhat da kamwi won kammon wow lai.
