U MDC na Rambrai-Jyrngam uwa man leh u Secretary ka Congress, u Bajop Pyngrope da pynsñiaw u yei sñiawkhia hawa yatoh wa i ku dor i Petrol wa Diesel ha ka jylla, iwa da ktah ya ki paidbah, katwa neiliang u Montri Rangbah ka jylla uwa man leh u President ka National People’s Party (NPP), u Conrad K Sangma dang boonkaam u wow lai seiñ Party cha Arunachal Pradesh. Da ong u wa katni ka jylla da chem jynjar ko tangwa u Montri Rangbah dang em por u wow lai chaad lai tem cha Arunachal Pradesh wow rwai ‘Summer of 69’.
U MDC ka Congress da ong u leh wa kani ka sorkar MDA wa yahkhmat da ka NPP, ka da pyrchang ko ya ki phang wa emkaam wow leh, tangwa da pynrap u wa lada ym jop hadooh wa kut, ym em myntoi.
Da e nongmuna u ya ka Inner Line Permit wa da chim da ka Resolution ha ka jylla, heiwa ki paidbah sah ki hei doom neibhah ym tip jia iyi, wei da pynrap chooh chooh wa ka sorkar India lyngba ka Home Ministry ym pynche ko hadooh katni iyi i daw lada ym e ya ka ILP.
Ha i jooh i por da kylli leh hajrong ka Report wa da ekti da ka High Level Committee wow kyrriah ya ki bru kiwa sah ha Them Metor, heiwa da ong chooh chooh wa lada em sakhiat katæ ka Report yong ka HLC, ka sorkar toh u pynyoo paidbah ya katæ ka Report.
U Bajop da ong u wa lada ym poi cha ka thong, ym myntoi wow chim ya kitai ki phang, neibhah kamwa da yoo katni, kani ka sorkar da kwah ko du wow pynyoo cha ki paidbah wow leh ki iyi wa da kular cha ki paidbah ha i por Election, tangwa tang iwi leh ym em poi cha ka thong kamwa da yooluti ki paidbah.
