Shillong: U Chief Executive Member ka Khasi Hills Autonomous (KHADC) da ong u wa ka Executive Committee ym klam palat ko da i ktien cha baar, tangwa daw leh bait da i kaam hawa yatoh wa i e ya ki Trading License cha ki baar jylla.
U CEM da ong u ya ini hawa yarap wow jubab ya iwa kylli ya ka chnat ka khayi pateiñ (Trade), heiwa da ong u leh wa ka KHADC daw pyrchang ko wow pynrkhiñ bait ya i e ya ki Trading License.
Neiliang u Executive Member, u Rangkynsai Kharbuki da pyntip u wa i e ya ki Trading License cha ki baar jylla man ko katkam ka United Khasi Jaintia Hills District (Trading by Non Tribal) Regulations, 1954. Da pyntip u leh wa neibynta wow yoh thymme ya ki License khayi hap wow yoh ya ka NOC na ki dorbar chnong wei daw lai sylli leh da ka chnat Enforcement yong ka Council.
Hawa chimbynta lang hawa kylli, u Ronnie V Lyngdoh da ong u wa ka KHADC ka haap ko wow yada ya ka khayi pateiñ, neibhah katkam ka aiñ, ya ki kam wa ye u kreh da ki tre chnong ym toh de wow e Trading License cha ki baar jylla.