15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1

Ka khubor wa khang yei dai doh masi toh i pynchoi ka ka Congress: BJP

0 Comments
Advertisement ad1
Advertisement ad1

Shillong: Ka Bharatya Janata Party (BJP) da beiñ joor ko ya ka seiñ Congress wa pynbaad ko wa toh ka (Congress) wa pynchongchit wow wanrah yei pynsñiawthooh ya ki paidbah wa da khang yow tynyap masi neibynta i wow dai doh masi.

Uwa e ktien ka BJP uwa pait ya ka jylla Meghalaya u Nalin Kohli hawa klam u wa kiwa pathai khubor ynne ka sngi da ong u wa ka aiñ Prevention of Cruelty to Animals Act 1960 toh kawa da chna da ka Congress katwa ka BJP ha kani ka kynti haap ko wow pynkrehkaam yeiwa phah ka Yungbichaar ka Supreme Court wow chna ya ki kyndon neibhah wa em wa ujor da ki kattu katni.

Da kyntait u yei mih khubor wa toh ka khubor hamsaya wa yah bakla ya ki paidbah ka Meghalaya, u Kohli da ong u wa, “Waroh i mih khubor wa ka BJP da khang ko wow baam doh masi toh iwa thok lut wei i thmu ka Congress wow pynchongchit ya ki paidbah “.

“Em hi mo wa em sakhiat kam ka tæ ka hukum wa pynmih u khang yow baam doh masi” da kylli u Kohli.

“Ki Hindu ym em baam doh masi ki, ki Muslim ym em baam doh sniang ki, ki Kristan baam doh masi ki baam doh sniang ki leh, neitæ i daw toh u burom iwi ya iwi wei i laitlooid wada e da ka riti synchaar (Constitution) ka ri India”, da ong u Kohli.

Kam wow pynkynmoo wa ka sorkar pyrdi da thaw ko ya ki kyndon hadien wa phah ka Supreme Court nei ujor mukotduma u Gauri Maulekhi pyrchah ya ka sorkar pyrdi ha ka 13 Naiynñiaw 2015 heiwa ka Supreme Court da hukum ko ya ka sorkar pyrdi wow chna ya ka aiñ hajrong wa kammon wow yada ya ki mrad nei chah chalan cha ka leh sñiawbha wa tip kam ka “Gadhimai” kawa man ha Nepal ha kawa jooh tynyap da ki hajar tylli ki mrad.

Da ong wa i thmu wa kongsan kini ki kyndon toh wow pyntikna wa ki mrad ki ym chah tynyap beiñ ki deiwa khang ya ki bru wa tynyap beiñ ya ki, wow khayi wow dai doh ya ki. Da ong u leh wa katkam ki kyndon kiwa tynyap neibynta i doh ymtoh u thied ya ki masi na ki yaaw tangwa toh u thied ya ki na ki na kiwa chare masi wow tynyap ya ki.

Share this:
Previous

Chah rahbor kawi ka muktiar na yung krehkaam u DC ynne i sngi

Next

Lai ood biang ka KJBWA cha u Mukul heiyatoh wei khang tynyap masi