Ynne ka sngi da man ko ka sngi wow sah khana parom ya ka Kiang Nangbah Government College, Jowai heiwa da lehkmen yei yoh ko i tipmit B Grade na ka National Assessment and Accreditation Council (NAAC) wei da man ko leh ka College sorkar wa nyngkong wa yoh ya ini i tipmit hapoh ka jylla.
Ha kani ka sngi da yoh ya ki kyntien pdiang burom na ka Principal ka College, ka Dr. EM Blah.
U Montri ka chnat Puræ Puthi ka jylla, u Lahkmen Rymbui kam u kongsan hawa e yei klam ha kani ka sngi da e khublei u ya kani ka thaw puræ heiwa da man ko ka College sorkar wa nyngkong dooh wow yoh ya kani ka kyrdan wei yeini da ye u leh dei chimkhia da waroh nadooh ki Principal, kiwa sikai wa ki khynnah.
Da ong u wa em boon ki thaw puræ kiwa da dooh yei yarap du neidaw wym yoh ki tei tipmit naka NAAC heiwa da ong u wow yoh yei tipmit toh iwa suk wei ymtoh wow sarom wei u swe wow pyndap u yaleh yei yoh tipmit naka.
Da ong u wa emkaam wow em i bahkhleih na waroh lang nadooh ka sorkar, kiwa sikai wa kiwi kiwi wei neibhah man-u-snem emkaam wow ekti ya ka bui krehkaam hajrong ini khnang wow pynneh ya ini i tipmit naka NAAC.
Da ong u leh wa ka Kiang Nangbah Govt. College da yah luti ko ya kiwi tawon ki College wow yoh ya ini i tipmit wei da pynchlur ko ya kiwi kam ka Sohra Govt. College, Tura Govt. College wa kiwi kiwi wow bood ki ya ki dak-kjat yong ka.
U Lahkmen da kyrmen u leh wa kani ka thaw puræ wow ye ko u esikai ha ka Post Graduate wei ini u ye i wow man iwa sakhiat du deiwa em i bahkhlieh na waroh kiwa emyatoh wa kani ka thaw.
Heijooh i por da ong u wa sñiawsarong wa ka Ri-loom Jaiñtia da yoh ko ya ka thaw puræ wa da tipmit na ka NAAC wei yeini da ye u khana yei jop wa ki kaam ka sorkar kam chibynta yong i lehkmen dap 75 snem ka ri wa 50 snem ka jylla ha u snem wow wan.
Chooh chooh da ong u wa ki khynnah na Ri-loom Jaiñtia ymtoh kiwa sahdien wei emkaam wow yah ya ki ha ka luti wa miat wa bha wei ka sorkar da yaleh ko wow pynwandur yeini deiwa e yarap ya kiwi ki College samen kam ka Jaiñtia Eastern College, Nongtalang College wa ka Shangpung College naka People’s College Scheme.
Kiwi kiwa da klam ha kani ka sngi kynthup ki ya u SR Lyndem uwa man Consultant ka RUSA, u D. Lyngdoh uwa man kam u khynnah warim ka College wa naka SMF Blah kawa man kam kawa sikai kani ka thaw.
Ya kani ka sngi da pynphooh da ki rwai wa chaad wa da pynkhreh da ki khynnah kani ka thaw puræ.
