theme-sticky-logo-alt
theme-logo-alt

Ka ktien Hindi kawa emkaam hadooh Class-X, tangwa ym mut wow pyndooh ya ka ktien yong i 

U Symbood Montri Rangbah ka jylla, u Prestone Tynsong da ong u wa ym toh iwa sñiawphylla wow pynman ya ka ktien Hindi kawa emkaam, wei da pyntip u leh wa ka sorkar jylla nadooh rap nachwa da booh ko ya ka ktien næ Subject Hindi wow man kawi na ki Subject wa kongsan, tangwa ym mut won wow ong wa daw pyndooh yei ktien yong i wa ka ktien English.

Da ong u wa hawa lai emkaam cha Delhi ym ye u lait ya ka ktien Hindi, wei ka pateiñ kawa katni man ko kawa emkaam wow chim ya ka Hindi hadooh Class-X.

U Prestone da ong u wa deiwa pynemkaam ya ka ktien Hindi hadooh Class-X, ym mut won wa ka sorkar India daw pynkrehkaam bait ko da ka Hindi wei ym chim de da ka English lane ka ktien yong idæ wei da pynrap u wa ka Hindi toh kawa toh u em nei sñiaw yong ka sorkar wa kiwa hadien habood toh u tip Hindi ki neibhah wa hap ya embynta lang wa ki bynta yong ka Ri Thor.

Chooh chooh da ong u wa ym toh wow sñiawthooh bakla wow ong wa pynkhreh ka sorkar India wow pynemkaam ya ka Hindi, tangwa kamwa man katni hawa lai cheiwon cheiwon kiwa boon klam ki da ka ktien Hindi.

Ha iwi i liang, hawa kylli yei ya tipmit ya ka ktien Khasi wa Garo hapoh ka Eight Schedule, u Symbood Montri Rangbah da ong u wa hawa yatoh wa ini, i yaklam wei i bichaar dang lai i chait chait hawa yatoh wow yoh yei tipmit wei ini ym mut wa hap wow yaklam noh da ka ktien Hindi. Da ong u wa ka sorkar kamwa da mynjur ya ka rai (Resolution) hapoh ka yung dorbar chna aiñ hadooh katni dang booddien.

Share this:
Previous

T. 8 lak kular u Sñiawbhalang Dhar yaka Dongwah Sohmynting 

Next

T. 25,000 daw toh ki truck kiwa chalan mooyong cha Bangladesh